Иброҳим Мбае Африка кубогида XXI аср рекорди ўрнатди
Африка миллатлар кубогининг 1/8 финалида Сенегал Судан устидан 3:1 ҳисобида ғалаба қозонди. Учрашувда дастлаб суданликлар ҳисобни очди ва турнирда илк бор ўзлари гол уришди, бироқ кейин сенегалликлар кетма-кет уч бор аниқ зарба йўллаб, иродали камбекни расмийлаштирди. Бу ҳақда euro-football.ru хабар беради.
Баҳсдаги сўнгги гол муаллифи ПСЖ ҳужумчиси Иброҳим Мбае бўлди. Маълум бўлишича, у XXI асрда Африка кубогида гол урган энг ёш футболчига айланди — Мбае ҳозир 17 ёш 344 кун.
Эслатиб ўтамиз, футболчи аввал Франциянинг турли ёш тоифасидаги терма жамоаларида ўйнаганига қарамай, кейинчалик онгли равишда Сенегал терма жамоаси сафида тўп тепишни танлаган.