Америкалик UFC жангчиси прогнози: Гэтжига қарши Пэддининг пайти келди

Енгил вазн (70 кг) тоифасида вақтинчалик чемпионлик камари учун кутилаётган Жастин Гэтжи — Пэдди Пимбблетт тўқнашуви атрофида қизғин муҳокамалар кун сайин кучаймоқда. Бу сафар прогноз билдирганлар орасида америкалик UFC жангчиси Марио Баутиста ҳам бор.

Баутиста бу жуфтлик ҳақида гапирар экан, икки спортчининг жанг услуби мухлисларга алоҳида завқ бериши, танлов қилиш эса осон эмаслигини таъкидлади. Шунга қарамай, у ўз қарорини Пэдди томонга бурди.

“Танлаш қийин, икковининг ҳам жангларини кўриш менга ёқади. Лекин бу сафар Пимбблеттни танлардим. Чунки ҳозир айнан унинг даври келяпти. Пэдди исталган рақибни муддатидан олдин таслим қиладиган ёки тўхтатиб қўядиган даражада тайёр кўринмоқда”, — деган Баутистанинг фикрларини “BJ Penn” нашри келтирди.

Дарҳақиқат, бу жангнинг мазаси ҳам шунда: Гэтжи — қаттиқ зарба, темп ва жангда “ўчмас газ” каби босим. Пэдди эса кутилмаган ҳаракатлар, ердаги иш ва тезкор якуний ечимлари билан хавфли. Яъни, бу тўқнашувда бир лаҳзада ҳамма нарса ўзгариб кетиши мумкин.

Эслатиб ўтамиз, Жастин Гэтжи ҳамда Пэдди Пимбблетт ўртасидаги беллашув 25 январь куни “UFC 325” турнири доирасида бўлиб ўтади. Мухлислар эса аллақачон санани белгилаб қўйган: бу кеча “кимнинг даври” эканини аниқ кўрсатиб бериши мумкин.