Аргентиналик «Килмес» стадионни янгилашга мухлисларни чақирмоқда
Аргентинанинг энг қадимий клубларидан бири саналадиган «Килмес» (1887 йилда ташкил топган) ҳозир оғир даврни бошдан кечирмоқда. Шу сабаб клуб раҳбарияти мухлислардан ёрдам сўради. Бу ҳақда euro-football.ru хабар беради.
Гап одатдагидек маблағ йиғиш ҳақида эмас: жамоа стадионни қайта қуриш ишларида бевосита жисмоний меҳнат билан кўмак беришни таклиф қилмоқда. Мухлисларга арена ҳудудида турли топшириқларни бажариб, таъмирлаш ва қайта жиҳозлаш жараёнида қатнашиш имконияти берилди.
Жанубий яримшарда жазирама ёз ҳукм сураётганига қарамай, «Килмес» ишқибозлари клуб чақириқига ижобий жавоб бериб, ташаббусни қўллаб-қувватламоқда.