Мартинович Хавертс билан ўйиндан кейинги кулгили суҳбатни эслади
"Қайрат" футболчиси Александр Мартинович Чемпионлар лигасидаги "Арсенал"га қарши ўйиндан сўнг рақиб ярим ҳимоячиси Кай Хавертс билан бўлган қизиқарли мулоқотини айтиб берди. Унинг сўзларига кўра, лондонлик футболчига Мартиновичнинг юзи таниш туюлган. Бу ҳақда euro-football.ru хабар беради.
Мартиновичнинг таъкидлашича, Хавертс: "Негадир юзинг менга жуда таниш" деган. Александр эса бунга жавобан аввалроқ "Байер"га қарши ўйнаганини, ўшанда немис клубидан ўтиб кетишганини, кейин эса Хавертс "Челси"да бўлган пайтда ҳам улар бир неча бор тўқнаш келишганини эслатган.
Шунингдек, Мартинович ўз коллекциясида Хавертснинг ўйин футболкаси борлигини ҳам қўшиб ўтди. Александр аввалроқ Россия чемпионатида ҳам тўп суриб, "Краснодар", "Урал" ва "Рубин" шарафини ҳимоя қилган.
Эслатиб ўтамиз, "Арсенал" ва "Қайрат" январ охирида Чемпионлар лигаси умумий босқичининг сўнгги турида учрашган. Лондон клуби ўз майдонида 3:2 ҳисобида ғалаба қозонган.