АПЛ грандлари ва Бавария қиммат вингер учун курашмоқда
"РБ Лейпциг"нинг 19 ёшли вингери Ян Диоманде ёзги трансфер ойнасида жамоасини ўзгартириши эҳтимоли юқори. Инсайдер Фабритсио Романо маълумотига кўра, футболчи учун "Бавария" ҳамда Англия Премьер-лигасининг бир нечта гранд клублари рақобатга киришган. Бу ҳақда euro-football.ru хабар беради.
"Лейпциг" ҳозирча истеъдодли ивуарияликнинг аниқ нархини белгилаб олмаган, бироқ футболчига бўлган қизиқиш жуда катта. Мюнхен клуби бош мураббийи Венсан Компани Диоманде салоҳиятини юқори баҳолаётгани таъкидланмоқда.
Transfermarkt порталида Диоманденинг қиймати 45 миллион евро деб кўрсатилган. Шунга қарамай, аввалроқ тарқалган миш-мишларга ишонилса, "қизил буқалар" унинг трансфери учун 100 миллион еврога яқин сумма сўраши ҳам мумкин.