Аргентина футбол раҳбари Тапиа коррупция иши бўйича сўроққа чақирилди
Аргентина футбол ассотсиатсияси (AFA) президенти Клаудио Тапиа ижтимоий бадаллар тўланмагани бўйича очилган иш доирасида прокуратурага сўроққа чақирилди. Бу ҳақда euro-football.ru хабар беради.
Ушбу ишда AFA ғазначиси Пабло Товигино ҳам гумондор сифатида тилга олинмоқда. Ҳуқуқ-тартибот органлари ҳар икки шахснинг мамлакатни тарк этишини вақтинча тақиқлади.
Сўроқ 5 март куни ўтказилиши белгиланган. Тергов AFA томонидан ижтимоий бадаллар сифатида давлат ғазнасига 13 миллион доллар етиб келмагани ҳақидаги маълумотлардан сўнг бошланган.
Шунингдек, Тапиа мулкида бўлган ва вертолёт майдончаси мавжуд 10 гектарлик қўрғон ҳам текширув доирасида шубҳа остига олинган.
Прокуратура алоҳида тарзда футболчиларга тўланадиган бонуслар миқдорига ҳам қизиқмоқда: улар Тапианинг дунё бўйлаб парвоз харажатларидан ҳам кам экани қайд этилмоқда.