Эрик Гарсия чемпионлик ўз қўлимизда эканини айтди

«Барселона» ҳимоячиси Эрик Гарсия Ла Лигадаги чемпионлик пойгаси ҳақида фикр билдирди. Бу ҳақда euro-football.ru хабар беради.

Гарсия жамоа натижа учун тўлиқ масъул эканини таъкидлаб, чемпион бўлиш-бўлмаслик ўзларига боғлиқлигини айтди. Унинг сўзларига кўра, «Реал Сосьедад»га қарши баҳсда «Барселона» ютқазмаслиги керак эди, чунки ғалаба учун етарли иш қилган.

Шунингдек, у «Жирона» билан ўйинда ҳакамликдаги хато бўлганини эслатди, бироқ жамоа барибир ўзидан кутилган даражадаги ўйинни кўрсата олмаганини тан олди. Ҳимоячи жамоа ҳозир тайёр эканини, олдинда қийин сафар учрашувлари турган бўлса-да, уларни уддалаш учун барча имконият борлигини билдирди.

25-турдан сўнг «Барселона» 61 очко билан Испания чемпионати жадвалида пешқадам. Иккинчи ўриндаги «Реал»дан устунлик эса атиги бир очкони ташкил этади.