Нобоа «Рубин» «Барселона»ни ютганида берилган бонусни айтди

2009 йил октябрида Қозоннинг «Рубин» клуби Чемпионлар лигасида тарихий сенсация яратиб, «Камп Ноу»да «Барселона»ни 2:1 ҳисобида мағлуб этганди. Ўша жамоанинг собиқ футболчиси Кристиан Нобоа ўша ғалаба учун берилган мукофот пулларини эслаб ўтди. Бу ҳақда euro-football.ru хабар беради.

Нобоанинг сўзларига кўра, бу унинг фаолиятидаги энг катта премиялар бўлган: ҳар бир футболчи 80 минг доллар олган. Бу ҳақда у «Спорт-Экспресс»га берган изоҳида айтиб ўтган.

Ярим ҳимоячи олинган маблағни дарҳол сарфламаганини, аксинча, жамғарганини таъкидлади — ўша пайтдайоқ ҳисоб-китобни биладиган йигит бўлганини қўшимча қилди.

Эслатиб ўтамиз, 2009/2010 йилги Чемпионлар лигаси гуруҳ босқичида «Рубин» ўз квартетида учинчи ўринни эгаллаган. Гуруҳда «Барселона» ва «Интер» юқорироқ поғоналарда якунлаган бўлса, Киевнинг «Динамо»си ортда қолган.