ОФК БАА ва Қатардаги Осиё Чемпионлар Лигаси ўйинларини кўчирди
Осиё футбол конфедерацияси (ОФК) минтақавий Чемпионлар Лигаси доирасидаги бир қатор учрашувлар бошқа муддатга қолдирилганини маълум қилди. Баҳслар Абу-Даби, Дубай ва Доҳа шаҳарларида ўтказилиши керак эди. Бу ҳақда euro-football.ru хабар беради.
Қарорга Эрон, АҚШ ва Исроил ўртасидаги ҳарбий кескинлик сабаб бўлди. Хабарларга кўра, Эрон томонидан учирилаётган снарядлар АҚШ ҳарбий базалари жойлашган қўшни мамлакатлар ҳудудига ҳам етиб бормоқда.
ОФК баёнотида конфедерация вазиятни диққат билан кузатишда давом этиши ҳамда футболчилар, жамоалар, расмийлар ва мухлислар хавфсизлигини таъминлаш масаласида қатъий позицияда экани таъкидланди.
Учрашувлар 2 ва 3 март кунлари ўтказилиши белгиланган эди. Ўйинларнинг янги санаси ёки ўтказиладиган жойи ҳозирча эълон қилинмади.