Илшат Фәрдиев «хәлле якташларын» авыл шәҗәрәләрен төзү өчен акча җыярга чакырды
(Актаныш, 4 февраль, «Татар-информ», Рифат Каюмов). «Челтәр компания»сенең генераль директоры Илшат Фәрдиев финанс мөмкинлеге булган якташларын «Ядкәр» проекты кысаларында авыл шәҗәрәләрен төзү өчен акча җыярга чакырды.
«Гөлнара Зәкәриевна (Габдрахманова - Т-и. иск) безгә беренчеләрдән булып район шәҗәрәсен төзергә мөмкинлек биргән икән, җиң сызганып эшләргә, аңа бу эштә ярдәм итәргә кирәк. Авыл халкыннан акча җыеп маташмыйк. Хәлле егетләр җыелышыйк та, финанс ярдәме күрсәтик. Үзен хөрмәт иткән һәркем тарихын белергә тиеш», — диде Илшат Фәрдиев.
Татарстанның Архив эше буенча дәүләт комитеты җитәкчесе Гөлнара Габдрахманова «Ядкәр» дип аталган шәҗәрәләр порталын туплау Актаныш районыннан башланасын әйтте . Бүген Актанышта ул районының авыл җирлеге башлыклары белән очрашты. Очрашуда Илшат Фәрдиев тә катнашты.
«Шәҗәрәләр порталын ясау шактый чыгымнар таләп итә. Бер уртача зурлыктагы авылны тулысынча тикшерү якынча 350 мең сумга төшәр дип фаразлыйбыз. Финанс ярдәме сорап, беренче чиратта, иганәчеләргә мөрәҗәгать итәбез. Шәҗәрәне бер мәртәбә тулысынча төзесәк, аннары һәр авыл кешесе үз шәҗәрәсен порталдан бушлай күчерә алачак», — диде Гөлнара Габдрахманова.
Илшат Фәрдиев якташларына туган як тарихының никадәр кадерле икәнен исбатларга теләп, тормышыннан бер хәлне сөйләде.
«Мин бервакыт Азат Җәббаров янына кергән идем. Кабинетында Уфа губернасының Минзәлә өязе картасын күргәч, ни өчен кергәнемне дә оныттым. Картада һәр авылның хуҗалык санына кадәр бар иде. Аны сорап алып, кайтып киттем. Аннары күчермәсен ясап, туганнарга, дусларга, авылдашларга тараттым. Кирәк булса, сезгә дә бирермен», — диде «Челтәр компания»сенең генераль директоры.