«Авырлы кызын кыйнады»: Әби кеше яшь гаиләнең тормышыннан тәмуг ясаган
Башкортстанда кызының күп балалы гаиләсе тормышын түзеп булмаслык иткән хатын-кызга карата шактый көтелмәгән хөкем карары чыгарылган. Ул үзе үк кызын, киявен һәм оныкларын үз өенә күчеп яшәргә чакыра, ә аннары эчүгә сабыша, даими тавыш-гауга чыгара башлый. Барлык туганнарына, хәтта сабыйларга да һөҗүм итә, ахыр чиктә йөкле кызын буып үтерә язган һәм йортта янгын да чыгарган. Бу турыда РЕН ТВ яза.
Шуннан соң гына туганнар полициягә мөрәҗәгать иткән, әмма эшнең мондый нәтиҗә белән тәмамлануын көтмәгәннәр. Бу хакта РЕН ТВ хәбәрчесе сөйләде.
Беренче карашка, әлеге әби бер зыянсыз булып күренә. Әмма Анна И. һич тә ягымлы пенсионерка булмаган. Берничә ел дәвамында ул үз кызын һәм аның гаиләсен даими рәвештә җәберләгән. Ә инде суд каршына баскач, үзен үзе «корбан» дип игълан иткән.
Берничә ел элек Ирина ире һәм балалары белән Уфа янындагы авылда яшәүче әнисенең өенә күчеп килгән. Моңа аларны нәкъ менә әнисе үзе чакырган. Яшь гаилә йортта ремонт ясаган, хатын-кызның бурычларын каплаган. Әмма рәхмәт урынына Анна И.дан мыскыллау, исерек килеш тавыш-гауга гына күргәннәр. Ул якыннарын даими рәвештә мыскыл иткән, хәтта кул күтәргән. Видеоязмаларда аның өйдә җиһазларны, савыт-сабаны ватуы күренә.
Башта ир белән хатын түзеп яшәгән, әмма барысы да Анна И., исерек килеш, йөкле кызының корсагына суккач, үзгәргән.
– Хатынымның гел күгәргән урыннары була иде, ул 1 атна хастаханәдә ятты. Йөкле килеш кыйнады, – дип сөйли зыян күрүче Иван А.
Шуннан соң Иринаның баласы төшү куркынычы була, аны хастаханәгә салалар. Табибларга ашыгыч рәвештә бала таптырырга туры килгән. Сабыйны шунда ук реанимациягә күчергәннәр.
– Хәзер генә реанимациядә балам янында булдым, хәле бик авыр, табиблар әлегә бернинди фараз да бирми, – ди Ирина.
Нәкъ менә шул вакыйгадан соң күп балалы ата-ананың түземлеге беткән. Алар полициягә гариза язган. Җинаять эше ачылган. Бүген сабыйның хәле яхшы, әмма әби-тиран оныгын әле озак күрмәячәк. Суд аны 3 ел да 6 айга ирегеннән мәхрүм итү карары чыгарган. Ул үз гаебен танымый. Конвой алып чыгып киткәндә дә, аның соңгы сүзләре үкенү турында булмаган.
– Әгәр аңа шартлы җәза бирсәләр, безнең тәмуг бетмәс иде, дип уйладым. Тикшерү барган вакытта да ул үзен элеккечә тотты. Бер тапкыр да гафу үтенмәде – ни миннән, ни улымнан, – дип сөйләде зыян күрүче хатын.