Министр: Ана өліміне мамандардың аздығы себеп

Үкіметте өткен баспасөз мәслихатында Қазақстанның денсаулық сақтау министрі Елжан Біртанов ана өлімі көбейген аймақтарға зерттеу жүргізгенін, "ана өліміне акушер-гинекологтардың, анестезиолог-реаниматологтардың жетіспеуі себеп" деген қорытындыға келгенін айтты. Бұл туралы Азаттық тілшісі хабарлады. 


Біртановтың айтуынша, көп аймақта босандыру мен денсаулық сақтау басшылары жоқ. "Жүктілерді есепке кеш алу да - (ана өлімі) себептерінің бірі" деді ол.    




Министр "2018 жылдың басынан бері 31 жүкті әйел қайтыс болды. 100 мың жаңа туған балаға 14-15 қайтыс болған анадан келеді" деді.      


Кей аймақтарда ана өлімінің көбейгенін айтқан министр денсаулық сақтау басқармаларына бала көтеру жасына жеткен әйелдермен жұмысты күшейтуді тапсырып, премьер-министр Бақытжан Сағынтаевтан әкімдерге ана мен бала өлімін азайту штабтарының отырысын өткізуді тапсыруын сұрады.