Ялган товарларга көн бетә
Зәйдә узган атнада “Контрафакт” дип аталган профилактик атналык үтте. Аның кысаларында район эчке эшләр бүлеге ялган товарлар әйләнешен кисәтүгә каршы рейд үткәрде. Нәтиҗәләр дә юк түгел. Полиция хезмәткәрләре үзәк базардагы бер сату ноктасыннан ялган дип шикләнелүче 10 данә ДVД диск, икенче ноктадан “Адидас” фирмасы ярлыгы тагылган спорт киеме, “Мәскәү ярминкәсе” кибетеннән шулай ук “Адидас”, “Найк” товар билгеле спорт һәм аяк киемнәрен алып, тикшерүгә җибәрде. Нәтиҗәләр расланганда, аны сатучылар җаваплылыкка тартылачак.