Թրամփը դադարեցրել է Գրին քարտի խաղարկությունը՝ ԱՄՆ-ում համալսարաններում տեղի ունեցած մահաբեր հրաձգությունների ֆոնին
ԱՄՆ նախագահ Դոնալդ Թրամփը կասեցրել է Գրին քարտի խաղարկության ծրագիրը (Diversity Visa Lottery)՝ այն բանից հետո, երբ պարզվել է, որ ԱՄՆ-ում վերջերս տեղի ունեցած աղմկահարույց հրաձգությունների կասկածյալը երկիր էր մուտք գործել հենց այդ ծրագրի միջոցով։
Խոսքը Պորտուգալիայի քաղաքացի, 48-ամյա Կլաուդիո Նևես Վալենտեի մասին է, որը կասկածվում է Բրաունի համալսարանում տեղի ունեցած հրաձգության մեջ․ այդ հարձակման հետևանքով զոհվել է երկու ուսանող, ևս ինը հոգի վիրավորվել են։ Նույն անձը կասկածվում է նաև Մասաչուսեթսի տեխնոլոգիական ինստիտուտի (MIT) մեկ դասախոսի սպանության մեջ։ Պաշտոնական տվյալներով՝ նա ավելի ուշ հայտնաբերվել է մահացած՝ ինքն իրեն պատճառած հրազենային վնասվածքով։
Լուրը հաղորդում է Associated Press-ը։
ԱՄՆ ներքին անվտանգության նախարար Քրիստի Նոեմը հայտնել է, որ Թրամփի հանձնարարությամբ ԱՄՆ քաղաքացիության և ներգաղթի ծառայությանը հրահանգվել է ժամանակավորապես դադարեցնել Գրին քարտի խաղարկությունը։ Նրա խոսքով՝ «այդ անձը երբեք չպետք է հնարավորություն ստանար մուտք գործելու Միացյալ Նահանգներ»։
Գրին քարտի խաղարկության ծրագիրը ամեն տարի վիճակախաղի միջոցով մինչև 50 հազար մարդու հնարավորություն է տալիս ստանալ ԱՄՆ մշտական բնակության իրավունք։ Ծրագիրը գործում է Կոնգրեսի ընդունած օրենքի հիման վրա և հիմնականում նախատեսված է այն երկրների քաղաքացիների համար, որոնք ԱՄՆ-ում քիչ են ներկայացված։ 2025 թվականի խաղարկությանը դիմել էր շուրջ 20 միլիոն մարդ։
Դոնալդ Թրամփը երկար տարիներ քննադատել է այս ծրագիրը՝ այն համարելով անվտանգության ռիսկեր պարունակող։ Փորձագետների կարծիքով՝ ծրագրի կասեցումը կարող է իրավական խնդիրներ առաջացնել, քանի որ այն սահմանված է օրենքով։
The post Թրամփը դադարեցրել է Գրին քարտի խաղարկությունը՝ ԱՄՆ-ում համալսարաններում տեղի ունեցած մահաբեր հրաձգությունների ֆոնին first appeared on MediaLab Newsroom-Laboratory.