Ցավոք, Հայաստանում անարդարությունները միայն պարգևավճարներով չեն սահմանափակվում. Սերոբ Խաչատրյան

Կրթության փորձագետ Սերոբ Խաչատրյանն անդրադարձել է ԱԺ պարգևավճարներին.

«Ցավոք, Հայաստանում անարդարությունները միայն պարգևավճարներով չեն սահմանափակվում։ Դրանք առկա են նաև աշխատավարձերի սանդղակներում։ Օրինակ՝ դպրոցի բազմաթիվ տնօրեններ ստանում են 220 հազար դրամ աշխատավարձ, բայց նրանց ենթակայությամբ աշխատող ատեստավորված և տարակարգ ունեցող ուսուցիչները ստանում են տնօրենից, փոխտնօրեններից շատ ավելի բարձր աշխատավարձ։ Պատկերացրեք, նախարարը ստանա 1.5 մլն դրամ աշխատավարձ, իսկ նույն նախարարության գլխավոր մասնագետը՝ 2 մլն դրամ։ Սա նորմալ կլինի՞։

Իրականում նախարարություններում էլ ունենք հակառակ անարդարությունը։ Նախարարների և փոխնախարարների աշխատավարձը բազմապատիկ ավելին է, քան վարչության, բաժնի պետերի, մասնագետների աշխատավարձը։ Նախարարության աշխատանքը ներսից պատկերացնող ցանկացած մարդու համար պարզ է, որ ոչ մի նախարար ու փոխնախարար չեն կարող հաջողության հասնել, եթե միջին և ցածր օղակներում աշխատող մարդիկ դեմոտիվացված են։ Կա «լուռ ընդվզում» կոչվող երևույթ։ Մարդիկ կարող են առանց ավելորդ աղմուկի ձախողել ցանկացած բարեփոխում։

Մեկ այլ անարդարություն։ Կամավոր ատեստավորումից բարձրագույն արդյունք ցուցաբերած, 4-րդ տարակարգ ունեցող Ֆիզիկայի, Քիմիայի, Կենսաբանության, Աշխարհագրության, Ինֆորմատիկայի ուսուցիչները 75000 դրամ ավել աշխատավարձ են ստանում, քան նույն ձեռքբերումներն ունեցող մնացած առարկաների ուսուցիչները։ Պատկերացրեք ինչ բացասական ազդեցություն է ունենում նման խտրական մոտեցումը դպրոցների առանց այն էլ ծանր միջավայրի վրա։

Աշխատավարձի բարձրացումը նուրբ հարց է։ Եթե սխալ իրականացնես, կարող ես ավելի շատ փող ծախսել ու ավելի վատ արդյունք ստանալ, գումարած անարդարության զգացում, թունավոր հարաբերություններ, համագործակցության նվազում»։

The post Ցավոք, Հայաստանում անարդարությունները միայն պարգևավճարներով չեն սահմանափակվում. Սերոբ Խաչատրյան first appeared on MediaLab Newsroom-Laboratory.