Ինձ թվում է՝ քաղաքագետ Սերգեյ Մարկովը ալկոհոլային ինտոկսիկացիայի տակ է. Կարեն Ավագյանը՝ Նժդեհի արձանը հանելու պահանջի մասին
Ինձ թվում է՝ քաղաքագետ Սերգեյ Մարկովը ալկոհոլային ինտոկսիկացիայի տակ է դեռ և ադրբեջանական լոբբիստական գործունեությունն արդեն սկսել է շատ բացահայտ կերպով իրականացնել. Tert.am-ի հետ զրույցում նման տեսակետ հայտնեց Հայաստանի Հանրապետական կուսակցության անդամ, ՀՀԿ պատգամավոր Կարեն Ավագյանը՝ անդրադառնալով Երևանում Նժդեհի արձանը հանելու պահանջին:
«Իսկ իրականում ամենաբարձր մակարդակներում մեր ռուս գործընկերների հետ, երբ նման արձագանք է եղել, ժամանակին քննարկումներ են եղել, ոչինչ չի փոխվել, մեր դիրքորոշումները նույն են, և որևէ մեկը, որևէ կլոր սեղան չի կարող սուվերեն պետության դեմ ինչ-որ առաջարկություններով ու մեղադրանքներով հանդես գալ»,-ասաց նա:
Կրկին ու կրկին թեման բարձրացնելը, ըստ Ավագյանի, բացարձակ սադրանք է։ «Պետք չի տրվել այդ սադրանքներին, որովհետև մարդիկ իրականացնում են ադրբեջանական լոբբիստական գործունեություն, և Մարկովը ալկոհոլային ինտոքսիկացիայի տակ է, դրա համար իր գործունեությունը սկսել է այսպես բացահայտ կերպով իրականացնել: Մենք, համենայնդեպս, անհանգստանալու որևէ բան չունենք, որևէ խնդիր և՛ արձանի հետ կապված, և՛ Գարեգին Նժդեհ կերպարի հետ կապված ՀՀ-ում չի կարող լինել, և դրա մասին ամենաբարձր ամբիոններից, ամենաբարձր մակարդակով մի քանի անգամ ասվել է մեր ռուս գործընկների հետ հանդիպումների ժամանակ, և որևէ խնդիր բնականաբար չկա»,-ասաց նա:
Ըստ Կարեն Ավագյանի, չարժե «ինչ-որ փոքր խմբի փոքր մարդկանց» նախաձեռնությունը դարձնել քննարկումների առարկա: «Քանի օր է՝ մամուլը ողողված է այդ անարժան մարդու առաջարկի քննարկմամբ, կարելի է բացել ադրբեջանական կայքերը, տեսնել՝ ինչ գովասանքի խոսքեր կան Մարկովի հետ կապված և հասկանալ, որ դա բացարձակ սադրանք է: Ես չեմ կարծում, որ մենք պետք է սադրանքների տրվենք»,-ասաց նա:
Հիշեցնենք, որ Ռուսաստանի Դաշնության Պետական Դումայում անցյալ շաբաթ կայացել է կլոր սեղան-քննարկում «Ֆաշիզմի հերոսացման և նեոնացիզմի վերածնման դեմ պայքարի, օրենսդրական ասպեկտներ» թեմայով։ «Կլոր սեղան»-ի ընթացքում քաղաքագետ Սերգեյ Մարկովը նշել է, որ Հայաստանն այն երկրների թվում է, որտեղ այսօր կան ֆաշիզմի հանցակիցների արձաններ, չնայած Հայաստանը Ռուսաստանի դաշնակիցն է։
Միջոցառմանը խոսվել է նաև ֆաշիզմի հերոսացման դեմ պայքարի ստորագրահավաքի մասին։ Արդեն հավաքվել է 200 000 ստորագրություն։ Միջոցառման մասնակիցները մատնանշել են, որ դրանում կա նաև Երևանում գտնվող Գարեգին Նժդեհի հուշարձանի հանման հատուկ պահանջ։