Ներքին անհրաժեշտ հիմքեր չունեն ռազմական արկածախնդրության համար, անհաջողությունը կարող է դառնալ ճակատագրական Բաքվի իշխանությունների համար․ Տ․ Հայրապետյանը՝ Զ. Հասանովի հայտարարության մասին
ԱԺ արտաքին հարաբերությունների մշտական հանձնաժողովի անդամ, «Իմ քայլը» խմբակցության պատգամավոր Տաթևիկ Հայրապետյանին ամենևին չի զարմացնում Ադրբեջանի պաշտպանության նախարար Զաքիր Հասանովի այն հայտարարությունը, թե «միջազգային իրադրությունն ադրբեջանական կողմին թույլ չի տալիս պատերազմ սկսել»:
Նա Tert.am-ի հետ զրույցում նշեց, որ վերջին շրջանում Արցախի հակամարտության շուրջ հետաքրքիր վերադասավորումներ են տեղի ունենում։ Հայրապետյանը նկատեց, որ Ադրբեջանը ներկայումս խուսափում է ակնհայտ թշնամանք արտահայտող արտահայտություններից։
«Մենք, ղարաբաղյան բանակցային գործընթացին մասնակից դառնալով, բերեցինք մեր օրակարգը, որի առաջին կետերից մեկը խաղաղության պատրաստել էր, որի մեջ մտնում են մի շարք քայլեր, որոնցից է նաև ռազմատենչ հռետորաբանության, ատելության խոսքի բացառումը և այլն։ Եթե հետևենք ընդհանուր դինամիկային՝ առնվազն Ալիևի մակարդակով, կնկատենք, որ խուսափում է ակնհայտ թշնամանք արտահայտող արտահայտություններից։ Այս պարագայում փաստացի ստացվում է, որ Ադրբեջանի ներքին դժգոհությունների պատճառը, որոնք միշտ ուղղորդվում էին դեպի հայեր ու ղարաբաղյան ճակատ, կարծես թե չկա։ Բնականաբար, հիմա դժգոհություններ կան, սակայն կրողն էլ դառնում է իշխանությունը»,- ասաց նա։
Հայրապետյանի կարծիքով՝ այսօր բանակցային գործընթացում հայկական կողմի առաջ քաշած դրույթները՝ անվտանգության մեխանիզմներ, ընդհանուր հումանիտար միջոցառումներ և այլն, բոլորին առավել, քան հասկանալի են, ինչն էլ նյարդայնացում է պաշտոնական Բաքվին. դրան զուգահեռ իրենց առաջ քաշած եզրույթներն այս պահին ընկալելի չեն։ Պատգամավորի խոսքով՝ Ադրբեջանում նաև բարձրաձայնվում է իրենց ռազմական բյուջեի տարեց-տարի ավելացումը և դրա հետ չուղեկցվող ռազմական գործողությունները։
«Բաքվի ռազմական բյուջեն մեծանում է, սակայն գործողություն չեն սկսում։ Նրանք իրենց որևէ քայլ չձեռնարկելը ներկայացնում են որպես խնդիր՝ պայմանավորված արտաքին քաղաքական հանգամանքներով։ Ես, այո՛, իսկապես կարծում եմ, որ Հայաստանի շուրջ ստեղծված իրավիճակը, փոփոխությունները, միջազգային տարբեր հարթակներում մեր ներկայացվածության և այլն, կապում է Բաքվի ձեռքերը։ Հասանովի խոսքին հավելեմ, որ ներքին անհրաժեշտ հիմքեր չունեն ռազմական գործողությունների ու արկածախնդրության գնալու համար, քանի որ որևէ մեկը հաջողություն չի երաշխավորել, ավելի՝ առաջին իսկ անհաջողությունը կարող է դառնալ ճակատագրական հենց Բաքվի իշխանություններ համար»,- ընդգծեց Տաթևիկ Հայրապետյանը։
Ինչ վերաբերում է փոփոխված իրողություններին, պատգամավորը հիշեցրեց վարչապետ Նիկոլ Փաշինյանի այն միտքը, որ, ըստ էության, սա ոչ թե լինելու է պատերազմ Ադրբեջանի ու Ղարաբաղի միջև, այլ լինելու է պատերազմ արժեքների՝ ժողովրդավարության ու ավտորիտարիզմի միջև ։
«Անցած տարվա փոփոխություններն ակնհայտ ցույց տվեցին, որ կա արժեհամակարգային տարբերություն, և այն գործընթացները՝ ժողովրդավարություն, բացություն և այլն, ամեն օր հստակ փոխում է ՀՀ դիրքերը միջազգային հարթակներում՝ հնարավորություն տալով ներկայանալ այլ լույսի ներքո։ Միշտ եղել է տարբերություն Բաքվի և Երևանի վարչակարգերի միջև, սակայն այժմ այն հսկայական է։ Բաքվի ներսում իր վարչակարգին մեղադրում են, որ կորցնում է Ղարաբաղը»,- ընդգծեց Հայրապետյանը։
Միևնույն ժամանակ պատգամավորը համակարծիք է, որ երբ բախվեն աշխարհաքաղաքական ու նավթագազային շահերը, ապա արտաքին աշխարհի որոշումների վրա չի ազդի ՀՀ-ի ժողովրդավար լինելը։ Այդ իսկ պատճառով, ըստ նրա, ՀՀ անվտանգության երաշխիքը հենց Հայաստանն է։
«Բնականաբար, քաղաքականության մեջ կան շահեր, այդ թվում նաև տնտեսական շահեր, սակայն ՀՀ-ն միջազգային հարթակներում ներկայանում է ոչ միայն որպես ժողովրդավարական արժեքների կրող ու հավատարիմ պետություն, այլ նաև պետություն, որը սուվերեն ու լեգիտիմ է իր իշխանությամբ և կարողանում է ներկայացել այն խնդիրները, որոնք իրեն հուզում են։ Մենք նաև պետք է հասկանանք, թե հանձին Ադրբեջանի ում հետ գործ ունենք և որևէ ձևով հույսը չդնենք միայն միջազգային արձագանքների վրա։ Մենք քաջ գիտակցում ենք, որ մենք ենք մեր անվտանգության երաշխավորը, իսկ բանակային ռեֆորմները վառ ապացույց են խոսքիս»,- շարունակեց Տաթևիկ Հայրապետյանը։
Խոսելով ՀՀ ԱԳՆ-ի կողմից Ադրբեջանի նախաձեռնած զորավարժությունների հարցը ԵԱՀԿ-ում բարձրացնելու մասին՝ Տաթևիկ Հայրապետյանն ասաց, որ նորություն չունի ընթացքից։ Այս համատեքստում նա չբացառեց, որ ինքը միջազգային հարթակներում կբարձրացնի Ադրբեջանի պատգամավորի սպառնալից հայտարարությունները՝ ուղղված ՀՀ վարչապետին ու պաշտպանության նախարարին։