Իսրայելական ԱԹՍ-ը Բեյրութում հարվածել է ՀԱՄԱՍ-ի գրասենյակին․ զոհվել է առնվազն 6 մարդ, այդ թվում՝ ՀԱՄԱՍ-ի ղեկավարի տեղակալը (տեսանյութ)
Իսրայելական անօդաչու թռչող սարքը Բեյրութի հարավային արվարձանում հարվածել է պաղեստինյան ՀԱՄԱՍ արմատական շարժման գրասենյակին, հաղորդում է լիբանանյան NNA գործակալությունը։
Գործակալության տվյալներով՝ ԱԹՍ-ը հարվածել է ՀԱՄԱՍ-ի՝ Ալ-Մուշարաֆիա թաղամասում գտնվող գրասենյակին, ինչի հետևանքով մի քանի մարդ է վիրավորվել։ Հարձակումից հետո վերոնշյալ թաղամաս են ժամանել շտապօգնության ավտոմեքենաներ։
Իր հերթին ՏԱՍՍ գործակալությունը, հղում անելով Բեյրութում ՀԱՄԱՍ շարժման բյուրոյում իր աղբյուրին, հայտնել է, որ հարձակման հետևանքով սպանվել է ՀԱՄԱՍ-ի ղեկավարներից մեկը՝ շարժման քաղբյուրոյի ղեկավարի տեղակալ Սալեհ ալ-Արուրին, ինչպես նաև երեք ակտիվիստ, որոնք հարձակման պահին եղել են շենքում։
Ավելի ուշ Լիբանանի ազգային լրատվական գործակալությունը հաղորդել է, որ իսրայելական ԱԹՍ-ի գրոհի զոհերի թիվն ավելացել է՝ հասնելով վեցի։
Միջադեպի կադրերը կարող եք դիտել Tert.am-ի թելեգրամյան ալիքում։