Թրամփը պատրաստ է Իրանում թե՛ ուժային, թե՛ դիվանագիտական տարբերակների. Սպիտակ տուն
ԱՄՆ նախագահ Դոնալդ Թրամփը Իրանի հարցում քննարկում է տարբեր սցենարներ, այդ թվում՝ ուժային, սակայն նախապատվությունը տալիս է դիվանագիտական լուծմանը։ Այս մասին հայտարարել է Սպիտակ տան մամուլի քարտուղար Քերոլայն Լևիթը։
«Կարծում եմ՝ նախագահ Թրամփի ամենաուժեղ կողմերից մեկն այն է, որ նա միշտ բոլոր տարբերակները պահում է սեղանի վրա։ Այդ տարբերակների թվում կարող են լինել նաև ավիահարվածները», – հունվարի 12-ին լրագրողների հետ զրույցում ասել է Լևիթը։
Միևնույն ժամանակ նա ընդգծել է, որ դիվանագիտությունը շարունակում է մնալ նախագահի համար հիմնական տարբերակը։ Լևիթի խոսքով՝ Թրամփը «չի վախենում ռազմական տարբերակների կիրառությունից, եթե դա անհրաժեշտ համարի, և Իրանը դա շատ լավ գիտի»։
Ավելի վաղ Դոնալդ Թրամփը հայտարարել էր, որ Իրանի իշխանությունները կապ են հաստատել Վաշինգտոնի հետ և ցանկություն հայտնել բանակցություններ վարելու։ Նրա խոսքով՝ ԱՄՆ-ի և Իրանի միջև հանդիպում է նախատեսվում, սակայն Իրանում շարունակվող հակակառավարական ցույցերի ճնշման ֆոնին «հնարավոր է՝ անհրաժեշտ լինի գործել այդ հանդիպումից առաջ»։ Թրամփը նաև նշել էր, որ ԱՄՆ-ն դիտարկում է պատասխան քայլերի «շատ կոշտ տարբերակներ»։
The post Թրամփը պատրաստ է Իրանում թե՛ ուժային, թե՛ դիվանագիտական տարբերակների. Սպիտակ տուն first appeared on MediaLab Newsroom-Laboratory.