Бұрынғы ханзада Эндрю "Эпштейн ісі" бойынша ұсталды
Ұлыбритания королінің бауыры Эндрю Маунтбеттен-Уиндзордың америкалық қаржыгер Джеффри Эпштейнмен байланысы тексеріліп жатқан тұста 19 ақпанда таңертең полиция "қызметті өкілетін асыра пайдаланды" деген күдікпен бұрынғы ханзада Эндрюді ұстады. Бұл жөнінде BBC және The Telegraph басылымы жазды.
Бұрынғы ханзада өзінің туған күнінде ұсталып отыр – бүгін ол 66-ға толды. Полицияның хабарламасында ұсталған адамның аты-жөні айтылмайды, тек "шамамен 60 жастағы ер адам" деп сипаттайды. "Беркшир және Норфолктағы" үйлерінде тінту жүріп жатқаны хабарланды.
Бейсенбі күні таңертең алты полиция көлігі Эндрю Маунтбеттен-Уиндзор тұратын Норфолк графтығындағы Сандрингем үй-жайына барған.
Ақпан айында Эпштейннің ісі бойынша жарияланған құжаттарда аты аталған жоғары лауазымды тұлғаларға тағылатын жаңа айыптарды тексеру үшін Ұлыбританияда арнайы үйлестіру тобы құрылған. Дерекке қарағанда, бұрын Ұлыбританияның сауда өкілі қызметін атқарған Эндрю Маунтбеттен-Уиндзор Эпштейнге құпия материалдарды берген.
Бұған дейін Эндрю өзіне тағылған айыптарды терістеген.
2021 жылы Америка азаматы Вирджиния Джуффре Эндрюді өзіне жыныстық зорлық-зомбылық көрсетті деп айыптаған. Оның сөзінше, Эпштейн оны ықпалды адамдармен жыныстық қатынасқа түсуге мәжбүрлеген, арасында ханзада Эндрю де болған. Джуффре өзіне қол жұмсаған, оның өлімінен кейін Ұлыбританияда мемуарлары жарық көрген.2025 жылы күзде Эндрю Эпштейнмен байланысы үшін ханзада атағынан айырылған. Ол сонымен бірге Йорк герцогы және орден кавалері атақтарынан да бас тартқан. 2022 жылы ол король отбасының мүшесі міндетін атқаруды тоқтатып, құрметті әскери атақтарынан бас тартқан.Биыл қаңтарда ВВС сайты жаңа зерттеуінде қазақстандық миллиардер Тимур Құлыбаев 2007 жылы Эндрю ханзададан Саннингхилл-парк зәулім сарайын жемқорлық ісіне қатысы бар компания арқылы сатып алған деп жазған еді.Эпштейнге қатысты құжаттарда Қазақстанның бірінші президентінің бұрынғы күйеубаласы Рахат Әлиев пен Назарбаевтың есімдері де аталатынын бұған дейін Азаттық жазған. Құжат Әлиевтің сол кездегі президент Назарбаевпен көп жылғы текетіресінен хабар береді.