Новости за 01.06.2022

1-июнда Чолпон-Ата шаарындагы "Алтын Балалык" ден соолукту чыңдоочу-реабилитациялык комплекси ишке берилди. Бул жайдын ачылышына президент Садыр Жапаров да катышты.  Медициналык-реабилитациялык борбор 8 блоктон турат. Ал жерде аллергология, онкология, пульмонология, акушердик гинекология, балдар хирургиясы, функционалдык диагностика жана неврология бөлүмдөрү бар. Комплекс бир мезгилде 400 баланы энелери менен кабыл алууга ылайыкташкан. Ошондой эле мекемеде медициналык илим изилдөө бөлүмү да иш алпарат. Читать дальше...

Январь окуяларына байланыштуу кармалгандардын туугандары Алматы прокуратурасынын жанында акция уюштурду. Алар жакындары кыйноого туш болуп жатканын айтып, ишти адилет тергөөнү талап кылышты. Инстаграмда жарык көргөн маалыматка караганда, акимиаттын өкүлү акция алдын ала макулдашылбаганын, андыктан “мыйзамсыз” деп эсептелерин айтты. Январь окуяларынан кийин кармалып, кыйноого туш болгондордун бири, фотограф Саят Адильбекулы “Азаттыктын” казак кызматына билдиргендей, акциянын алдында аларды коррупцияга каршы кызматка чакыра баштаган. Читать дальше...

Ысык-Көл облусундагы Тосор ашуусунда эки чабан 30 баш бодо малы, 80 баш жылкысы менен өтө албай калганын 1-июнда Өзгөчө кырдаалдар министрлиги (ӨКМ) билдирди. Мекеменин маалыматына караганда, май айында нөшөрлөгөн жаандан кийин Сырт өрөөнүнө калың кар жаап, ашуудан өтүү кыйындаган. Ысык-Көлдүн Сырт өрөөнү Нарын облусунун жайлоолору менен чектешет. Өрөөндөгү жайлоолордо Тоң районунун чабандары, малчылары жайкысын мал багышат. ӨКМ жеринен барып тактоо жана жардам берүү үчүн ашууга беш куткаруучу адис жөнөп кеткенин билдирди. Читать дальше...

31-майда Кытайдын Шанхай шаарында COVID-19 илдетине байланыштуу киргизилген эки айга созулган карантин алынды. 25 миллион калктуу финансылык борбордун жашоочуларына 1-июндан тарта үйүнөн чыгууга, жумушка барууга, коомдук транспорт колдонууга жана менчик машине айдоого уруксат берилди. Эки ай бою маанилүү экономикалык хабдын тургундары тамак-ашка, медициналык тейлөөгө жете албай келген учурлар болгон. Бейтаптарды, арасында жашы жете элек балдарды жакындарынан ажыратып, күчтөп борборлоштурулган карантин жайларына алып кетип жатышты. Читать дальше...

Бишкекте майыптыгы бар балдар Чыңгыз Айтматовдун "Биринчи мугалим" чыгармасынын негизинде спектакль коюшту. Алты акттан турган спектаклди германиялык режиссёр Кристоф Штольценбург "Үмүт-Надежда" балдар реабилитациялык борборунда койду. Анда жалаң майыптыгы бар балдар роль жараткан.

2-июнда түнкүсүн Кыргызстандын аймагында жаан-чачын жаабайт. Күндүз Чүй, Талас, Ысык-Көл, Нарын облустарынын кээ бир райондорунда, Ош, Жалал-Абад, Баткен облустарынын тоо этектеринде жана тоолорунда өткүн өтүп, бийик тоолуу райондордо кар жаайт, Ош, Жалал-Абад, Баткен облустарынын өрөөндөрүндө жаан-чачын жаабайт. Батыш тараптан келген шамалдын ылдамдыгы секундасына 4-9 метрге, Ысык-Көл жана Нарын облустарында 15-20 метрге жетет.   Абанын температурасы: Чүй облусунда түнкүсүн 10...15, күндүз 22…27; Талас жергесинде түнкүсүн 8...13... Читать дальше...

Бүгүн 1-июнда Бишкекте балдардын экинчи эл аралык "Наристе" фольклордук фестивалы башталып, иш-чарага президент Садыр Жапаров да катышты. 8-июнга чейин мерчемделген фестивалга Орусиянын Алтай, Тыва республикаларынан, Казакстандан, Монголиядан келген өкүлдөр, Кыргызстандын жети облусунан балдар фольклордук топтору катышат. Фестивалдын негизги максаты – Кыргызстандын салттуу элдик маданиятын сактоо жана өнүктүрүү жана башка өлкөлөрдүн элдик искусствосу менен тааныштыруу. Түрдүү мастер-класстар... Читать дальше...

Жогорку Кеңештин 1-июндагы отурумунда аткаруу бийлигинин ишине карата сын айтылды. Депутат Балбак Түлөбаев нааразы жарандар парламентке кайрылып жатканын билдирип, айрым жергиликтүү бийлик башчылары жана министрликтер өлкө жетекчилигинин ишин үзгүлтүккө учуратып жатат деген пикирин айтты: “Баары Жогорку Кеңешке депутаттарга келип жатышат. Уксаң, анын баары аткаруу бийлиги аткара турган иш. Же губернаторлук институтту, же акимдик институтту жок кылыш керек. Сүйүнөбүз, кээ бир жерде иштеп жатышат, алар келген жок бизге. Читать дальше...

1-июнда Кыргызстанда эки же андан көп аял алуунун кесепеттерин жана  мыйзамдык жоопкерчиликтерин түшүндүргөн маалымат өнөктүгү башталды. Евробиримдик менен БУУнун “Теңдик нуру” биргелешкен демилгесинин колдоосу менен ишке ашырылып жаткан долбоор алкагында интернеттеги социалдык түйүндөр аркылуу маалымат таркатылат. Уюштуруучулар билдиргендей, “Иш-чаранын негизги максаты – өткөн жыл соңунда ишке кирген Кылмыш-жаза кодексиндеги аялдарга жана кыздарга карата зомбулукка байланыштуу өзгөрүүлөр боюнча коомчулукка маалымат берүү”. Читать дальше...

Сузакта мугалимдин ур-токмогуна кабылган окуучу кызга психологиялык басым жасалып жатканын бүгүн 1-июнда Жогорку Кеңештин жалпы жыйынында депутат Винера Раимбачаева билдирди: “Окуучуга психологиялык басым болуп жатат. Бизге ошондой маалымат келди. Мугалимдерден, райондук администрациядан. Мугалимдин да, окуучунун да укугун тебелебешибиз керек”. Депутат окуучу кыз ооруканада дарылануусун улантып жатканын кошумчалады. Өткөн аптада мектепте окуучу мугалим менен айтышып, анын ур-токмогуна кабылган видео интернетте тараган. Читать дальше...

Активист Гүлжигит Исаков 31-майда Кыргыз-Түрк “Манас” университинде “Фетхуллахчы террор уюму. Параллелдүү мамлекеттик түзүм” (ред: түрк бийлиги Фетхуллах Гүлендин кыймылын ушинтип атайт) деген аталышта өткөн семинар боюнча Тышкы иштер министрлигине университетке чара көрүү боюнча кайрылды. Исаков Кыргызстанда мындай тыюу салынган террордук уюм жок экенин, университет билим берүү ишинен четтеп, Түркия бийлигинин саясатын Кыргызстанга таңуулап жатканын айтты: “Түркия менен Кыргызстандын өкмөт аралык... Читать дальше...

1-июндан баштап Кыргызстанда багууга жана көзөмөлгө муктаждар жашы 18ге толсо да алардын жеке ассистенти үчүн каражат төлөнө берет. Бул тууралуу Эмгек, социалдык камсыздоо жана миграция министрлигинен кабарлашты. 18 жашка чейинки курактагы майыптыгы бар баланы бакканы үчүн жеке ассистентке же камкорчуга мамлекеттик бюджеттен 4900 сом өлчөмүндө айлык акы төлөнүп келген. Бала 18 жашка толгондо айлык төлөө токтотулчу. 1-июндан тартып айлык акы төлөө улантылат жана анын өлчөмү 4900 сомдон 6300 сомго жогорулатылат. Читать дальше...

Баткен облусунда район-шаарлар ортосунда аткезчиликке каршы уюштурулган көзөмөл бекеттер маселеси Жогорку Кеңеште кайрадан көтөрүлдү. Парламенттин 1-июндагы отурумунда депутат Адахан Мадумаров көйгөйдү Лейлек районунун Кулунду айылынын мисалында айтып, 24-майдан бери жер семирткич буулганын билдирди: “Жер семирткич бүтүндөй буулуп калган. Бул посттор тойбой койду. Губернатор “Бүгүн чекит коем, бүгүн чекит коем” деп кайра-кайра жазып жатат. 24-майдан бери ушундай абал”. Мадумаров айыл чарба, атайын кызмат... Читать дальше...

Тажикстандын президенти Эмомали Рахмон тогуз жылдык тыныгуудан кийин Иранга иш сапар менен барды. Тегеранга таарынычынан улам тажик лидери бул аралыкта ал жакка каттаган эмес. Ооганстандын башында турган “Талибан” менен чыңалган ымаланын жана Кыргызстан менен чек арадагы ири жаңжалдан кийинки бул жакындашуу түрдүү талкууларга жем таштады. “Азаттыктын” тажик кызматынын макаласын Эрнист Нурматов кыргызчалады. Тогуз жылдан кийинки сапар Тажик президенти Эмомали Рахмон расмий иш сапар менен Тегеранга 29-майда келди. Читать дальше...

1-июнь – Балдарды коргоонун эл аралык күнүнө карата куттуктоосунда мамлекет башчысы Садыр Жапаров ата-энелердин жоопкерчилиги тууралуу маселени козгоп, баланын адам болуп чыгуусу үчүн татыктуу тарбия берүү керектигин айтты. Президент мамлекеттен кандай гана жардам берилбесин, эң негизги мээримди жана камкордукту бала өзүнүн бекем, туруктуу жана мээримдүү үй-бүлөсүнөн аларын белгилеп, баланы тарбиялоодо үй-бүлөнүн орду чоң экенин кошумчалады. “Ата-энелерге балдарына туура таалим-тарбия берүүнү эч качан кечиктирбеш керектигин эскертер элем. Читать дальше...

Бүгүн 1-июнда Бишкекте Кыргызстан менен Бириккен Араб Эмирликтеринин (БАЭ) бизнес-форуму өтөт. Ага катышуу үчүн кечээ Кыргызстанга БАЭнин экономика министри Абдулла бин Таук Ал-Марри баштаган, курамында ишкерлер бар расмий делегация келген. Кыргызстандын Экономика жана коммерция министрлиги билдиргендей, форумга эки өлкөнүн авиация, энергетика, соода-сатык, инвестиция жана өнөр жай тармактарынын өкүлдөрү катышат. Эки мамлекет ортосунда дипломатиялык мамилелер 1996-жылы башталган. Кыргызстандын... Читать дальше...

Бүгүн 1-июнда Кыргызстанда адам укуктары боюнча даректүү тасмалардын “Бир дүйнө Кыргызстан” эл аралык фестивалына катышууну каалагандардан арыз кабыл алуу башталат. Фестивалды быйыл 16-жыл уюштуруп жаткан “Бир дүйнө Кыргызстан” укук коргоо кыймылынын маалыматына караганда,  бул жолу ал "Климат жана каатчылыктар: жарандардын фундаменталдык укуктары боюнча кырдаал. Туруктуу өнүгүү максаттары үчүн альтернативалар” темасына арналат. Уюм тараткан маалыматта “Дүйнө өзгөрдү, климаттык өзгөрүүлөргө байланышкан кыйынчылыктар жана тобокелдиктер... Читать дальше...

Бүгүн 1-июнда Бишкекте Орусияга эмгек миграциясына кетип жаткан кыргызстандыктардын укугун коргоо боюнча биргелешип иштөө маселесин талкуулаган жыйын өтөт. Мигранттардын укугун коргоодо Орусия менен Кыргызстандын тийиштүү мекемелеринин ортосундагы кызматташтык тууралуу сөз болорун уюштуруучулар – Санкт-Петербургдагы «ПСП-фонд» уюму жана Кыргызстандын “Улгайган адамдардын ресурстук борбору” кабарлашты. Орусиядан келген адистер бул өлкөнүн тыштан барган эмгек мигранттарына карата саясаты, мыйзамдары... Читать дальше...

Бүгүн 1-июнь – Балдарды коргоонун эл аралык күнүнө карата Кыргызстанда бир катар иш-чаралар өтөт. Алардын бири Борбордук шайлоо комиссиясынын имаратында уюштуруларын “Балдарды коргоочулар лигасынан” кабарлашты. Kids IT Day форумуна майыптыгы бар балдар жана муктаж үй-бүлөлөрдө тарбияланып жаткан 12-17 жаштагы балдар, кыздар катыша алат. Алар үчүн инновациялык жана маалыматтык технологияларга кызыгуусун арттыра турган оюндар, сынактар, мастер-класстар уюштурулат. Белгилүү адистер жана блогерлер балдарга өз тажрыйбасы... Читать дальше...