Чек ара кызматы: кыргыз-тажик чак арасында абал туруктуу
Кыргызстандын мамлекеттик чек ара кызматынын маалыматында, Баткен районундагы Таш-Тумшук айылында такталбаган аймактагы жолго тажик тарап асфальт төшөй баштаган.
Буга каршы болуп жергиликтүү эл чогулган. Окуя болгон жерге кыргыз тараптын чек арачылары барып, асфальт төшөө иштерин токтотууну талап кылышкан. Бирок тажик тарап таш менен ургулап баштаганда кыргыз чек арачылары асманга ок аткан.
31-декабрда эртең менен болгон бул окуя боюнча эки тараптын чек ара кызматынын, укук коргоо органдарынын өкүлдөрү, жергиликтүү бийликтин өкүлдөрү сүйлөшүү жүргүзүп, жолго асфальт төшөө иши токтотулган. Мамлекеттик чек ара кызматы учурда абал туруктуу экенин маалымдады.
Азырынча Тажикстандын расмий органдарынын маалыматы айтыла элек.
Буга чейин Кыргызстандын Мамлекеттик чек ара кызматынын маалыматында, 24-августта Лейлектин Жаңы-Жер айыл аймагына караштуу Борбордук айылында чек ара чыры катталган. 15-20 тажик жараны короосуна тосмо куруп жаткан кыргызстандыктан ишти токтотууну талап кылып, ал жер тактала элек тилке экенин айтышкан.
Тажикстандын чек ара аскерлери 24-августтагы окуяга кыргыз тарап күнөөлүү экенин айткан. Мекеме тараткан расмий маалыматта кыргызстандык жаран тактала элек тилкеде курулушка тыюу салынганына карабастан май куюучу станция курганы жатканы айтылат. “Баткендин тургундары дайыма ортодо кабыл алынган протоколдорду бузуп, чагымчыл аракеттерге барышат” деп айтылат тажик чек арачыларынын билдирүүсүндө.
Быйыл июль айында кыргыз президенти Сооронбай Жээнбеков менен тажик президенти Эмомали Рахмондун жолугушуусу өтүп, анда чек ара маселеси талкууланган. (TSh)