Ingen Nato-avklaring for Sverige før neste år
Nasjonalforsamlinga i Tyrkia har gått ut i ferie, og kjem ikkje til å behandle Sveriges Nato-søknad før til neste år, melder Sveriges Radio. Det vil seie at saka tidlegast blir behandla 16. januar, når det tyrkiske parlamentet samlar seg igjen. Tysdag gav utanrikskomiteen grønt lys for svensk medlemskap i forsvarsalliansen. Godkjenninga i nasjonalforsamlinga er det siste steget i godkjenningsprosessen. Tyrkia og Ungarn er dei einaste Nato-landa som enno ikkje har godkjent den svenske søknaden.