Sinn Féin-topp kjem til kroninga av kong Charles

Nestleiaren i det republikanske partiet Sinn Féin, Michelle O'Neill, er invitert til kroninga av Storbritannia sin nye konge og har takka ja til å kome.

O'Neill seier ho takkar ja for å vise partiet si vilje og dedikasjon til å bygge gode relasjonar og fremje fred og forsoning.

At Sinn Féin vel å delta er endå eit signal om at forholdet mellom den irske republikanske rørsla og det britiske kongehuset beveger seg i ei fredeleg retning.

– Vi lever i ei tid med store endringar. Ei tid for å respektere våre ulike, men legitime ambisjonar, ei tid for å fokusere på framtida og moglegheitene som det neste tiåret vil bringe, seier O'Neill. (NTB)