یونان او ترکیې په سمندرګي کې د تېلو پر زېرمو د لانجې حل ته لېوالتیا ښودلې
د یونان صدراعظم کیریاکوس میڅوتاکیس نن د ترکیې هغه اقدام وستایه چې د مدیترانې سمندرګي په ختیځ کې د دواړو هېوادونو له لانجمنې سیمې څخه یې خپله یوه پلټونکې کښتۍ ایستلې ده.
ترکیې د عروج رییس په نوم دا کښتۍ د تېلو او ګاز د پراخو زېرمو د پلټنو لپاره د مدیترانې هغې سیمې ته استولې وه چې یونان د مالکیت دعوه پرې لري.
دې اقدام د ناټو د دې دوو غړو اړیکې هومره ترینګلي کړل چې دواړو دې سیمې ته خپلې جنګۍ کښتۍ واستولې.
د یونان صدراعظم وویل، ښکاري چې د آتن او انقرې لانجه د خبرو له لارې د حل کېدو پر لور روانه ده.
هغه زیاته کړه چې که یونان عملا د کړکېچ د کمېدو نښې وویني نو دی به لومړی کس وي چې د خبرو مېز ته کېني.