د افغانستان کرکټ ملي لوبډلې په ابوظبۍ کې تمرینات پیل کړي
د افغانستان کرکټ ملي لوبډلې یو شمېر لوبغاړو د عربي متحده اماراتو پر وړاندې د ۳ شل اوریزو سیالیو لپاره په ابوظبۍ لوبغالي کې تمرینات پیل کړي دي.
که څه هم د افغانستان کرکټ بورډ متحده عربي اماراتو ته د لوبغاړو د سفر او هلته د تمریناتي کمپ په تړاو څه نه دي ویلي، خو ابوظبۍکرکټ او سپورټ مرکز په خپلې فېسبوک پاڼې لیکلي چې افغان لوبډلې د فبرورۍ په ۷مه هلته تمرینات پیل کړي دي.
افغانستان به له عربي متحده اماراتو سره د روانې فبرورۍ میاشتې په ۱۶مه نېټه لومړۍ لوبه ترسره کړي او پاتې دوه لوبې یې د همدې میاشتې په ۱۸مه او ۱۹مه نېټه پلان شوي دي.
د ویلو ده چې اوس هم د افغانستان ملي لوبډلې یو شمېر لوبغاړي د اماراتو په نړیوال او د بنګله دېش په غوره لیګ سیالیو کې لوبېږي.