Perm: Türkmenistanly Öwezberdi Sabirow atyşykda 20-den gowrak adamy halas etmäge kömek etdi
Türkmenistanly Öwezberdi Sabirow, Permiň döwlet milli gözleg uniwersitetinde dörän atyşyk wagtynda 20-den gowrak adamy ewakuasiýa etmäge kömek etdi. Bu barada 26-njy sentýabrda uniwersitetiň web sahypasynda habar berildi.
20-nji sentýabrda atyşyk başlananda, Himiýa fakultetiniň üçünji kurs studenti Öwezberdi Sabirow birinji gatdady we sapagyň başlamagyna garaşýardy. Beýleki okuwçylaryň atyşyk barada gygyrýandyklaryny eşidip, ýaralanan garawuly gören ýigit howpsuz däldigine düşündi diýip garaşsyz neşirler uniwersitetiň resmi maglumatyna salgylanyp, habar berýär.
Sabirow dostlaryny we töweregindäki 20-ä golaý adamy ýygnap, 7-nji korpusa alyp barypdyr we ol ýerde edara işgärleri olara ewakuasiýa çykyşyny görkezipdir. Sabirow ilki bolup çykmaga synanyşypdyr, emma gapyda dyknyşyk döränsoň, aýnadan böküp daşary çykypdyr we geçip barýan adamlara howp barada duýduryp, polisiýa jaň edipdir.
Perm uniwersitetinde, birinji kurs studenti Timur Bekmansurowyň eden ok atyşygy zerarly alty adam öldi, kyrkdan gowrak adam ýaralandy. Atyjynyň özi agyr ýaralanypdy, ýöne aman galyp, keselhanada saklanýar.
“Turkmen.news” neşri ýaralananlaryň arasynda üç türkmenistanlynyň bardygyny habar berýär: 26 ýaşly Aýbibi Saparowa, 24 ýaşly Nurýagdy Saparow we 23 ýaşly Sapardurdy Berdiýew.
Türkmenistanyň prezidenti Gurbanguly Berdimuhamedow bu waka bilen baglanyşykly rus kärdeşi Wladimir Putine gynanç bildirdi, ýöne ýaralanan watandaşlary barada hiç zat aýtmady diýip neşir belleýär.