Owganystanda artýan hüjümleriň arasynda bazardaky partlamada azyndan iki adam öldi
“Talybanyň” Nangarhardaky Maglumat we medeniýet edarasynyň Azatlyk Radiosynyň Owgan gullugyna beren maglumatyna görä, 20-nji iýundaky partlamada ýaralananlaryň arasynda “Talybanyň” bäş agzasy hem bar.
“Talyban” partlamanyň sebäbini we onuň mümkin nyşanasy barada hiç zat aýtmady. Emma ýerli media bazarda içi partladyjyly ulagyň ýarylandygyny, şeýle-de munuň bilen “Talybanyň” ýerli resmisiniň nyşana alnandygyny habar berdi.
Partlamanyň jogapkärçiligini hiç kim we hiç bir topar öz üstüne almady.
BMG-niň Owganystandaky missiýasy hüjümi dessine ýazgardy we partlamada ýaralanan asuda ilatyň arasynda çagalaryň hem bolandygyny belledi.
“Owganystanda parahat ilatyň dowamly nyşana alynmagy dessine bes edilmelidir” diýip, BMG-niň Owganystandaky missiýasy nygtady.
Soňky günlerde Owganystanyň dürli künjeklerinde hüjümler ýaýbaňlandyryldy.
Geçen dynç günleriniň dowamynda “Yslam döwleti” jeňçi topary Kabulda sikhlaryň ybadathanasyna hüjüm edip, iki adamy öldürdi we başga-da ýedi adamy ýaralady. Şeýle-de Kabulyň etraplarynyň birinde ulagyň partladylmagy netijesinde iki adam heläk boldy.