Новости за 30.11.2023

29 ноябрьдә Ижевскиның Халыклар Дуслыгы йортында «Татарча QR- Код: Татар ханнары тамгалары» күргәзмәсенең презентациясе узды. Бу турыда Удмуртиянең «Яңарыш» газетасы социаль челтәрдәге сәхифәсендә хәбәр итте.

Ульяновск өлкәсенең «Өмет» газетасында Зур Чирекле авылыннан Хәлимә Рамазанованың «Зур Чирекле мәктәбендә Мөнәҗәтләр кичәсе» дигән язмасы чыкты.

Нурлатта алтынчы тапкыр Җәлил укулары узды. Каһарман шагыйрь Муса Җәлилнең әсәрләрен татар, рус һәм башка халыклар телләрендә дә укырга мөмкин иде. Бу хакта «Нурлат-информ» хәбәр итә.

АКШның элеккеге дәүләт секретаре Генри Киссинджер вафат булган. Аңа 100 яшь иде. Бу турыда ТАСС Kissinger Associates оешмасына сылтама белән яза.

Менделеевскиның Советлар Союзы Герое М.С.Фомин исемендәге 1нче урта гомуми белем бирү мәктәбендә махсус операция катнашучысы Марсель Искоркин белән очрашу узды. Ул үзенең хезмәт итүе һәм хәзерге вакытта махсус операция зонасындагы хәлләр турында сөйләде. Бу хакта «Менделеевск яңалыклары» хәбәр итә.

Бөгелмәдә Яңа ел шәһәрчеген бизәү концепциясен тәкъдим иттеләр. Аны «Эшлекле дүшәмбе» киңәшмәсендә шәһәрнең баш архитекторы Илназ Мөкъминов тәкъдим итте. Бу хакта «Бөгелмә авазы» хәбәр итә.

Чүпрәледә Татарстан Республикасы прокуроры, Конституцион суд судьясы булып эшләгән Сәйфихан Нәфиевны искә алдылар. Ул җәмәгать тәртибен саклауга һәм хокук бозуларны профилактикалауга зур өлеш керткән прокурорларның берсе. Бу хакта «Туган як» сайтында хәбәр ителә.

Лениногорск шәһәренең Н.М.Кудашев исемендәге музыка мәктәбендә кайчандыр бөтен Татарстанга үзен таныткан «Чишмә» иҗат берләшмәсе 65 еллык юбилеен «Чишмәләр ургылып аксыннар» дигән әдәби-музыкаль кичә итеп үткәрде. Бу хакта «Заман сулышы» хәбәр итә.

"Мемориал" хокук яклау үзәге шурасы әгъзасы Александр Черкасов бүген куәт оешмалары "дөреслеккә каршы көрәшә" дип саный, АКШ белән бәйле басмаларга эшләүче журналистларга Русиягә кермәскә киңәш итә, нинди генә авыр еллар булса да, Русиядә хокук яклаучылар эшләргә тырыша ди.