Алексей Песошин Апас районында капиталь ремонт үткәрелгән Мәдәният йортында булды
(Казан, 29 август, «Татар-информ»). Татарстан Премьер-министры Алексей Песошин Апас районында капиталь ремонт үткәрелгән Мәдәният йортында булды. Ул республика бюджеты хисабына төзекләндерелгән. Бу турыда Татарстан Мәдәният министрлыгы матбугат хезмәт е хәбәр итә.
1977 елда төзелгән Мәдәният йорты бинасында җылыту системасы яңартылган һәм тәрәзәләр алмаштырылган. Ярты ел эчендә подрядчылар нигезне ныгыткан, электр һәм су белән тәэмин итү системаларын алыштырган. Әйләнә-тирә территорияне төзекләндергәннәр. Шулай ук класслар өчен заманча җиһазлар һәм мебель сатып алынган.
Мәдәният йортында тамашачылар залы яңа, биредә 300дән артык утыргыч, экран һәм заманча 3D цифрлы проектор урнаштырылган. Хәзер Апаста яшәүчеләргә зур экранда кинематография яңалыкларын карау өчен Казанга барырга кирәкми.
Яңача планлаштыру ярдәмендә түгәрәкләр өчен мәйдан да киңәйтелгән. Эшчеләр бинаның подвалын тәртипкә китергән, анда дәресләр өчен өстәмә урын җиһазландырылган. Елның җылы вакытында репетицияләрне хәзер бинаның түбәсендә, уңайлы террасада да, үткәрергә мөмкин булачак.
Яңартылган мәдәният йортына физик мөмкинлекләре чикләнгән кешеләр дә йөри ала, бина пандус һәм махсус бәдрәф белән җиһазландырылган, керү юлында чакыру төймәсе куелган.
Ремонт эшләренә, җиһазларны яңартуга республика бюджетыннан 74 млн сум акча бүлеп бирелгән.