Татарстанда 25 градуска кадәр салкын булачак

Иртәгә, 9 декабрьдә, Татарстанда моңа кадәр урнашкан салкын һава торышы сакланачак, ләкин температура фоны акрынлап күтәрелә башлый. Татарстанның Гидрометеорология үзәге шулай дип хәбәр итә.

Аязучан болытлы һава торышы көтелә. Төнлә явым-төшем яву ихтималы бик аз, көндез урыны белән, шул исәптән Казанда да, бераз кар явачак.

Моннан тыш, көньяк һәм көньяк-көнбатыштан талгын җил фаразлана, тәүлекнең якты вакытында аның тизлеге кайвакыт секундына 15 метрга кадәр көчәячәк.

Төнге һәм иртәнге сәгатьләрдә Татарстан буенча һава температурасы -14..-19 градус салкын булачак, аязган вакытта -25 градуска кадәр (Татарстан Республикасы башкаласында -14..-16 градуска) төшәчәк. Көндезге сәгатьләрдә һава -7..-12 градуска кадәр җылына (төбәкнең ерак көнчыгышында – -16 градус, Казанда -7.. -9 градус булачак).

Метеорологлар мәгълүматларына караганда, ял көннәрендә Россиянең Европа территориясенең зур өлеше, шул исәптән Татарстан да, «көнбатыш циклоннары һәм аларның атмосфера фронтлары йогынтысында» булачак. КФУ профессоры Юрий Переведенцев, һава торышы үзгәрү сәбәпле, аномаль җылылык килүен һәм бозлы яңгыр яву ихтималы турында сөйләде.