Якын көннәрдә Татарстанда температура фонында кискен тирбәнешләр көтелә

Аномаль салкын һава торышыннан соң Татарстан Республикасы көнбатыш циклон атмосфера фронтлары йогынтысына дучар булды. Бу хакта ТР Гидрометеорология һәм әйләнә-тирә мохитне күзәтү идарәсе хәбәр итә.

Узган тәүлектә һава шартлары сизелерлек начарайды: территориянең күпчелек өлешендә кар, төнлә урыны белән көчле кар яуды. Кайбер районнарда буран нәтиҗәсендә күз күреме 1000 метрга кадәр начарайды, җилнең тизлеге секундына 16 метрга кадәр җитте. Һава температурасы тәүлек буе -9..-14 градуска кадәр тәшкил итте.

Алдагы көннәрдә фронталь бүленешләр йогынтысында республиканың күпчелек районнарында сизелерлек явым-төшем күзәтеләчәк, урыны белән көчле җил һәм буран чыгуы, күз күреме начараю, бозлавык барлыкка килүе ихтимал. Температура фонында кискен тирбәнешләр көтелә. Юлларда кар көртләре һәм бозлавык хасил булачак.

Җомга, 30 гыйнварда, Татарстанда кар һәм җепшек кар көтелә. Кайбер районнарда бозлавык, буран һәм җилнең тизлеге секундына 15-20 метрга кадәр көчәюе фаразлана. Төнлә һава температурасы -5..-10 градус, көндез 0..-5 градус, кичкә тагын -5..-10 градус тәшкил итәчәк.

Ял көннәрендә, 31 гыйнварда һәм 1 февральдә, көньяк циклон Россиянең Европа территориясенә чыгу белән, республикада шулай ук кар явуы көтелә. Кайбер районнарда буран һәм көчле җил чыгуы ихтимал. Төнлә температура -7..-13 градус тәшкил итәчәк, төньяк һәм көнбатыш районнарда -18 градуска кадәр түбәнәячәк. Көндез исә -3..-10 градус, төньякта һәм көнбатышта -13..-15 градус булуы көтелә.

Синоптиклар кисәтүенчә, катнаш характердагы явым-төшемнәр һәм һава температурасының күтәрелүе түбәләрдән кар һәм боз төшүгә китерергә мөмкин. Халыкка сак булырга киңәш ителә.

Татарстан Республикасы Гидрометеорология һәм әйләнә-тирә мохитне күзәтү идарәсе фаразлавынча, киләсе атна башында, 2 февральдә, кар явачак. Көндез температура -4..-9 градус, көнбатыш районнарда -10..-15 градус тәшкил итәчәк.