Илк ер усти метро станциялари 2019 йил Наврўз байрамигача қуриб битказилади

Лойиҳа доирасида 2 мингга яқин таянч устунлар ва оралиқ тўсинлар, 13 мингга яқин темир-бетон балкалар ўрнатиш ва 35 бекат ташкил этиш назарда тутилган.

Лойиҳа беш босқичда амалга оширилади. Дастлаб Тошкент метрополитенининг "Дўстлик" бекатидан Қўйлиқ бозоригача бўлган қисми қурилади. 11 километрлик масофада 8 бекат бунёд этиш мўлжалланган.
Бугунги кунга қадар халқа метро йўлининг 4 километр қисмида қурилиш ишлари амалга оширилиб, 206 та таянч устуни учун котлован қазиш ишлари бажарилган. Устунлар устига кўндаланг темир-бетон таянчлар ўрнатиш ишлари бошланган. Устунлар оралиғини бирлаштирувчи 16 та темир-бетон балка ўрнатилган.

Давлатимиз раҳбари ер усти халқа метро линияси қурилишида эътиборга олиш лозим бўлган жиҳатларга алоҳида тўхталди. Бунёдкорлик ишлари узлуксизлигини таъминлаш, унинг атрофини ободонлаштириш, "Дўстлик" бекатидан Қўйлиқ бозоригача ва Қўйлиқ бозоридан "Олмазор" бекатигача бўлган 22 километрлик қисмини 2019 йил Наврўз байрамигача фойдаланишга топшириш юзасидан зарур кўрсатмалар берди.

Айни пайтда халқа метро линиясидаги поезд ва бошқа техникаларни бошқариш учун 50 нафар мутахассис Жанубий Корея ва Хитойда малака оширмоқда. Метрода ҳаракатланадиган янги поездлар ҳам тайёрланмоқда.

Шунингдек, Шавкат Мирзиёев Сергели туманида амалга оширилаётган метро қурилиши билан танишди. Узунлиги 7,1 километр бўлган Тошкент метрополитенининг Сергели линияси қурилиши 2020 йилга қадар қуриб, фойдаланишга топширилиши кўзда тутилган. Сергели метро линияси ҳозиргача Марказий Осиёда қўлланилмаган бутунлай янгича эстакада усулида бунёд этилмоқда. Мазкур линия кўприксимон тарзда қурилади, поездлар ер устида ҳаракатланади. Қизиқарли яна бир жиҳат, поездлар тўхташ маскани, яъни бекатлар 4 вагондан иборат метро поездига мўлжаллаб қурилади. Бекатларда йўловчиларга қулайлик яратиш мақсадида махсус лифт ва эскалаторлар ўрнатилади.

Лойиҳанинг умумий қиймати 105 миллион долларга тенг. Лойиҳа доирасида 265 жуфт таянч устун ва оралиқ тўсинлар ўрнатиш, 6 та йўловчи бекатини ва 6 та ташқи электр таъминоти станциясини қуриш кўзда тутилган. Метронинг Сергели йўналиши Чилонзор йўналишининг “Олмазор” бекатидан бошланиб, “Йўлдош” даҳасигача бўлган ҳудуддан ўтади ва бир кеча кундузда 15 минг йўловчини ташиш имконини беради.

Айни пайтда лойиҳанинг 5 километр қисмида қурилиш ишлари амалга оширилмоқда. 130 жуфт таянч устунлар ўрнатилган. Устунлар устига 60 та оралиқ тўсинлар қўйилиб, бирлаштирувчи балкаларни ўрнатиш ишлари бошланган. Асосий қурилиш ишлари лойиҳанинг 3 ва 6-километрлари оралиғида амалга оширилмоқда. Қолган қурилиш қисмида уй-жой ва нотурар жой объектларини ҳамда ташқи муҳандислик коммуникация тармоқларини бошқа ҳудудларга кўчириш ишлари давом этаётир.
Қурилиш ишларига 70 дан ортиқ техника ва механизмлар, 350 нафар малакали муҳандис ва ишчилар жалб қилинган. Жорий йил якунига қадар 6 километр масофада темир-бетон конструкцияларни монтаж қилиш ҳамда 3 метро бекатини қуриш ишлари тугалланиши белгиланган.