Фунт стерлинг номи қаердан келиб чиққан? — Бизга қўшилинг: ???? https://t.me/joinchat/AAAAADwt0NGCRoONT4f1_Q

Фунт стерлинг номининг келиб чиқишига бир неча тахмин ва фаразлар мавжуд. Баъзи манбаларга кўра, бу ном ХII асрда пайдо бўлган ва дастлаб «бир фунт соф кумуш» деган маънони англатган. Бу «стерлинг» - қадимги инглиз кумуш тангаси номи билан боғлиқ. 1 фунт кумушдан 240 та танга зарб қилинган (Тауэрдаги Қироллик зарбхонасида сақланадиган стандарт «Tower pound» 5400 гран ёки тахминан 350 граммдан иборат). Йирик олди-сотдилар «фунт стерлинг»да ифодаланган. Бошқа томондан, бу тангаларнинг оғирлигини текшириш усули эди - агар 240 танганинг оғирлиги 1 фунтга тенг бўлмаса, тангалар сохта ёки жуда эскирган бўлган. 1955 йилда Оксфорд инглизча луғати стерлинг номи тахминан 1300 йилга бориб тақалиши ва кичик юлдузчалари (қадимги инглизча: стеорлинг) бўлган кумуш норман пеннисининг умумий номидан келиб чиққанлиги ҳақида фаразни таклиф қилди. Энг кенг тарқалган назария Уолтер Пинчебек томонидан илгари сурилган «Easterling Silver» (шарқий ерлар кумуши) номидир. Бу Шимолий Германияда тангалар ишлаб чиқарилган 925 пробали кумушнинг ўзига хос қотишмасини билдирган. Инглизлар «Easterling» деб аташган бу бешта шаҳардан иборат ҳудуд ХII асрда Ганзей иттифоқи таркибига кирган. Бу ҳудуд Лондонда ўз ваколатхонасига эга бўлиб, Англия билан фаол савдо-сотиқ ишларини олиб борган, товарлар учун юқори сифатли ва қаттиқликка эга (соф кумуш жуда юмшоқ ва тез эскиради) маҳаллий тангалар тўланган. Қирол Генрих II 1158 йилдан бошлаб худди шундай қотишмани Англия тангалари учун стандарт қилди. Аста-секин, нутқда қотишма номи «Sterling Silver»га қисқартирилди ва «кумуш танга»нинг эквивалентига айланди. Америкалик антрополог ва сиёсатшунос Лия Гринфелднинг фикрича, фунт стерлинг номига Пўлат саройи (ингл. Steelyard) жойлашган Лондон Ҳанзей идорасининг «Easterlings» деган номи таъсирини ўтказган. Бу ном пул бирлигига 1694 йилда Англия банки биринчи марта банкнотларни чиқаришни бошлаган пайтда берилган. Замонавий инглиз тилида фунт сўзи Буюк Британия пулларига нисбатан қўлланилади. Британия валютасини бошқа мамлакатлардаги бир хил номдаги валюталардан фарқлаш учун расмий ҳужжатларда фунт стерлингнинг тўлиқ кўриниши (pound sterling) қўлланилади. Камроқ расмий матнларда инглиз фунти (British pound) атамаси учрайди. Сўзлашув нутқида quid сўзи ҳам ишлатилади. Унинг келиб чиқиши лотинча «Quid pro quo» иборасидан олинган деб фараз қилиниб, товарлар ёки хизматларнинг тенг алмашинувини билдиради. Бошқа тахминга кўра, бу сўз инглиз тилидаги quid – “чайналадиган тамаки” маъносидадир. Америка биржа трейдерлари орасида фунт стерлинг «кабель» деб аталади. Бунга 19-асрнинг ўрталаридан бошлаб Британия котировкалари тўғрисидаги маълумотлар Атлантика океани туби бўйлаб ётқизилган кабель орқали Америкага узатилгани сабаб бўлган. Фунт стерлинг 18-19-асрларда дунёнинг аксарият мамлакатларида асосий заҳира валютаси бўлган. Иккинчи Жаҳон урушидан кейин Буюк Британиядаги оғир иқтисодий вазият ва Америка Қўшма Штатларининг глобал иқтисодиётдаги устунлигининг кучайиши фунт стерлингнинг энг муҳим валюта мақомини йўқотишига олиб келди. У 2006 йилнинг ўрталарида учинчи энг кенг тарқалган захира валютага айланди. Ёқуб Умар тайёрлади Манба: Azon.uz