Ўзбекистонга сармоя ва кредит бериш бўйича Хитой олдинда, Россия иккинчи ўринга чекинди
Жорий йилнинг январь-июнь ойларида Ўзбекистонда асосий капиталга ўзлаштирилган инвестициялар ҳажми 139,1 триллион сўмни (ёки шу кунлардаги курс билан тақрибан 11,5 миллиард АҚШ долларини) ташкил этган.
Статистика агентлиги қайдича, бу маблағнинг 59 триллион сўмини (тақрибан 4,9 млрд доллари) хориждан келган инвестиция ва кредитлар ташкил этади.
Агентлик ҳисоботидан келиб чиқилса, биринчи ярим йилликда Ўзбекистонда ўзлаштирилган жами хорижий инвестиция ва кредитлар ҳажмида энг юқори улушга эга бўлган инвестор мамлакатлар ўртасида 20,5 фоиз билан Хитой биринчи ўринда турибди. 18,8 фоизлик улушга эга бўлган Россия иккинчи ўринда, Саудия Арабистони эса (8,5 фоиз) учинчи ўринда бормоқда.
Март ойида Статистика агентлиги 2022 йили Ўзбекистонда 270 триллион сўмлик сармоя ўзлаштирилгани, бунинг 112,2 триллион сўмини хорижий инвестиция ва кредитлар ташкил этгани ҳақида маълумот тарқатган эди. Ўшанда Ўзбекистонга ётқизилаётган сармоя ва берилаётган кредитлар бўйича Россия биринчи ўринда (20,3 фоиз), Хитой иккинчи ўринда (16,4 фоиз), Туркия эса учинчи ўринда (10,1 фоиз) экани қайд этилган.
Хитойнинг Ўзбекистонга инвестиция ва кредит киритиш бўйича Россияни ортда қолдириш тенденцияси жорий йилнинг биринчи чорагидан буён кузатилмоқда.