Daily Mail: Citibank Нозима Ҳусаиновани антисемитик пости учун ишдан ҳайдади
Британиядаги Daily Mail нашрининг хабар беришича, Citibank асли ўзбекистонлик экани айтилаётган ходими Нозима Ҳусаиновани ҲАМАСнинг террор ҳужуми ортидан яҳудийлар ҳақида “Гитлер улардан қутулишга бежиз уринмаган” деб пост ёзгани ортидан ишдан ҳайдаган.
Нью-Йорк шаҳар университети, Бруклин коллежини молия бўйича битирган Ҳусаинова ҳолокостни оқлаб пост қўйган. 25 ёшли Нозима ижтимоий тармоқларда жиддий норозиликлар авж олгач ишдан бўшатилган. Банк сўзчиси унинг постини “ёқимсиз” деб атаган ва банк нафрат оҳангига тоқат қилмаслигини билдирган.
Унинг пости Ғазодаги касалхонада бўлган портлашдан кейин қўйилган.
“Биз ижтимоий тармоқда бундай ёқимсиз антисемитик пост қўйган ходим билан меҳнат шартномасини бекор қилдик. Биз антисемитизмга ва барча турдаги нафрат нутқларига тоқат қилмаймиз», деган банк сўзчиси DailyMail.com нашрига.
Мижозлар банкни ўз ходимлари орасидаги “бетизгин антисемитизм”га тоқат қилаётгани учун айблаган.
“Ҳой, Сити, сизнинг турфахиллик, тенглик ва инклюзивлигингиз нацистларни ҳам қабул қиладими?” деб ёзган Дэниел С. Леви исмли фойдаланувчи X’да.
Ҳусаинованинг LinkedIn профилига қараганда у ушбу банкда иккинчи йили ишлаётган экан. Citigroup'да дунё бўйлаб 250 000 одам ишлайди.
Salary.com’га кўра, АҚШда ушбу банкда мижозлар билан ишловчи ходимлар ўртача 72,056 доллар маош олади.
Нозима Ҳусаинованинг ўзи ҳозиргача Citibank қарорига муносабат билдирмаган.
Можаро бир неча Бош ижрочи директорлар ҲАМАСнинг террор ҳужуми учун Исроилни айбловчи талабаларни ишга олмаслик ҳақида огоҳлантирганидан кейин юз берган.
Американинг энг нуфузли юридик ширкатларидан бири Исроилни айблагани учун уч нафар талабага берилган ишга таклифни бекор қилган.