Новости за 05.06.2018

"Порт" сәүдә үзәгендә тауарлары янган сәүдәгәрләрне кредитларны каплау мәсьәләсе борчый. Кайберләренең тауарлары элегрәк "Яңа Тура", "Адмирал" сәүдә үзәкләрендә дә янган булган.

"Туган телләргә каршы канунга юк" инициатив төркеме Русия мәктәпләрендә туган телләрне өйрәнүне ихтыярига калдыру турында канун өлгесенең Русия думасында иртәрәк каралачагын хәбәр итә.

Алтай республикасыннан танылган активист Зинаида Тырысова милли телләрне ихтыярига калдыру канун өлгесен кире кагуны сорап, Алтай халкы Корылтаена мөрәҗәгать иткән.

Казанның Совет районы мәхкәмәсе балигъ булмаганнарга карата азгын гамәлләр кылуда һәм экстремизмда гаепләнгән Ольга Гавриленко-Зыятдинованы 8 августка кадәр сак астында тоту карары чыгарды.

Пенсия яшен арттыру идеясен русияләрнең 9 проценты гына хуплый. 82 процент моңа каршы. Халык пенсия яшенә җитми үләрбез дип курка.

Быел Татарстан мөселманнары Ураза гаетен 15 июньдә билгеләп үтәчәк. Җомга көненә туры килгән бәйрәм республика мәчетләрендә таң атуга Коръән уку белән башланачак. Казанда Ураза гаете Татарстан мөфтие Камил хәзрәт Сәмигуллин катнашында Тукай урамында урнашкан Галиев мәчетендә үтәчәк.

Русия президенты Владимир Путин Донбасстагы сугышны 2000-нче еллар башында Чечнядә булган сугыш белән чагыштырды һәм Украина көнчыгышындагы низагны чишәр өчен Киевка фетнәчеләр контролендәге җирләргә аерым статус бирергә кирәк дип белдерде.

Ялгыз пикетка чыккан "Азатлык" берлеге әгъзасы Рәфыйк Кәримуллин Казанның "Вишневский" полиция бүлегенә чакырылган.

5 июнь иртәнге тугызынчы яртыларда Казанның Оренбур трактында урнашкан "Порт" сәүдә үзәгендә янгын чыкты. Әле анда янгын сүндерүчеләр, коткаручылар эшли.

Казанны басып алучылар һәйкәленә Мәскәү дә, республика җитәкчелеге дә акчасын да, игътибарын да кызганмый. Казанны яклаганда шәһит киткән татарлар истәлегенә Яңа татар бистәсендә төзелгән Иске таш мәчетне төзекләндерүгә инде ничә еллар буе акча таба алмыйлар.