Россияда ўзбеклар бошқа миллатлардан эмас, бир-биридан энг кўп қўрқади
Забардаст йигит Россияга ишга отланиб турибди. Аввалги келишида кўп йиллик ниятларидан бири ушалиб, «Жентра» олган экан. 3-4-ой ҳавас ила минган, энди билса, машина қорин тўйдирмайди, қолаверса, харажати ҳам кўп. Энди шуни сотиб, яна Россияни кўзламоқда. Ҳовлида чанг босиб ётганидан не фойда? Янги маркалари чиқаяпти, бу тезда эскиради. Ўзи қачон қайтиши ҳам аниқ эмас. Қолаверса, оиласига нафақа қолдириши керак, машинани томоша қилиб ўтиришадими? Яна қизиқ томони, ярим йил аввал суюна-суюна сотиб олган нархидан 1-2 минг дўллар арзон баҳогаям харидор чиқмаяпти…
Тушлик баҳона Русияда ишлаб юрганлар ҳақида айрим таассуфли гапларни айтди. «Россияда ўзбеклар бошқа миллатлардан эмас, бир-биридан энг кўп қўрқади. Бошқа миллатлар аҳил, албатта бир-бирини қўллайди, фақат ўзбеклар ундай эмас. Ўзбеклар энг кўп сонли, агар ўзаро бирикса, бир-бирини қўлласа, бизга ҳеч кимни кучи етмайди. Лекин ўзаро ишонч йўқ, қадр йўқ.
Россияда хор бўлиб юрган ўзбекларнинг сон-саноғи йўқ, ҳеч ким уларни сўрамайди. Бир-бирини алдаш, сотиш, чув тушириш, пулини тортиб олишда бизга етадигани йўқ»… Хуллас, йигит бундай савдоларни кўп кўргани сезилиб турибди, лекин уни эшитиш ҳам осон эмас! Масалан, эс-ҳушли, бақувват 32 ёшлардаги шу йигит – қачонгача Россияга қатнайди, оила, фарзандлар тарбияси нима бўлаяпти?
«Фалончи оғайним Россияда ишлаб, «евро-уй» қурди, лекин қишлоқ адоғидаги уйига бориш учун трактор керак, йўл йўқ…» дейди. Ўзи-чи? Пул топибди хўп, лекин шу машина жуда зарилмиди? Кейинги келишида томорқасини девор билан ўрайди, ўғлини суннат қилади. Яна кетади… Шу тариқа йиллар ўтади, аста-секин ёки тўсатдан куч-қувват ҳам кетади.
Ахир, у ёқда кундалик режим, яхши овқат, ўзини парвариш қилиш қайда! Унгача, ўрнига ўғли «Россиябоп» бўлиб етишиб қолади.
Айтганча, унинг ўзи иккинчи ё учинчи авлод «гастарбайтер» бўлса керак.
Ватанда эса… қайта-қайта янги счётчиклар ўрнатиш, охири кўринмайдиган қарздорлик, миллат, давлат, иймон-инсоф деган тушунчаларга тупурган монополиялар, қарсакбоз депутатлар ва лўттибоз амалдорлар, давлат идораларида миллиард-миллиард ўғирликлар, аросатда қолган иқтисод, таълим, тиббиёт тизими…