Наманганда Lacetti машинасида 50 та маъмурий жарималар борлиги аниқланди
Маълумки, ҳар бир транспорт ҳайдовчисидан белгиланган йўл ҳаракати қоидаларига амал қилиши сўралади. Лекин, айрим ҳолларда бу талабга риоя қилинмагани бугунги кунда фото ва видео мосламалар орқали аниқланмоқда.
Бироқ, баъзи бир ҳайдовчилар жарима қўлланилганини билсада, 60 кун ичида бартараф этиш чораларини кўришмаяпти. Бу эса ўз навбатида маъмурий жарималарни мажбурий тартибда ундиришга олиб келмоқда.
Бугунги кунда Мажбурий ижро бюроси Наманган вилояти бошқармаси ва унинг ҳудудий бўлимлари томонидан йўл ҳаракати қоидаларини бузиш билан боғлиқ жарималарни ундириш борасида қатор чора-тадбирлар амалга оширилмоқда. Айниқса, йўл ҳаракатларини бузиб, қўлланилган жарималарни тўламаётган ҳайдовчиларга нисбатан тегишли чоралар кўрилмоқда. Куни кеча олиб борилган тадбирлар давомида 50 та маъмурий жаримани тўламай келаётган ҳайдовчининг транспорт воситаси вақтинчалик торилди.
Маълум бўлишича, Наманган туманида яшовчи Ш.Юсупов “уддбуронман”, қўлланилган жаримани тўламасам ҳам бўлади деган шекилли. Йўқ, ундай бўлмади. Бюронинг Наманган туман бўлими иш юритувига келиб тушган ҳужжат ижросини таъминлаш мақсадида ҳайдовчи огоҳлантирилган. Бироқ, бундан тўғри хулоса қилмади шекилли.
Охир-оқибат бошқарувидаги Ласетти вақтинчалик жарима майдончасидан жой олди. Энди Ш.Юсупов жами 18,4 млн сўм қарздорликни тўлайди, кейин белгиланган талаблар асосида машинасини минади.