Мицкоски:ќе се обидам да формирам влада, ако не опција се избори
![Мицкоски:ќе се обидам да формирам влада, ако не опција се избори](https://gdb.rferl.org/e1180000-0aff-0242-2a1e-08d9a092ad21_w800_h450.jpg)
Претседателот на ВМРО-ДПМНЕ Христијан Мицкоски денеска на прес конференција во партиското седиште рече дека новото парламентарно мнозинство кое го објави вчера значи дека оваа влада на Зоран Заев паѓа. Нагласи дека мнозинството е обезбедено за да падне оваа Влада и оти ќе се обиде да формира политичка влада.
„Тоа значи дека во периодот што следи ќе се обидам, повторувам, ќе се обидам да формирам нова влада и тоа ќе се случи само доколу бидам сигурен дека тоа ќе биде влада на сериозен кредибилитет, влада со силни институции кои ќе гарантираат стабилност, нова енергија и ефикасност во реформите и проблемите кои следат. Доколку не се постигне оваа цел кон која се стремам и не обезбедам потполна ефикасност на владата, тогаш она што ни преостанува како единствена опција се брзи предвремени парламентарни избори“, рече Мицкоски.
Мицкоски: имаме ново парламентарно мнозинство
Тој од говорницата неколкупати ги покажа листовите на кои како што рече се потпишани 61 пратеник. Тврди дека имале притисоци.
„Од она што јас знам е дека уште во текот на вчерашниот ден се прават жестоки притисоци врз луѓето кои се потпишани овде своерачно. Познавајќи ги методите на власта, се е можно“, рече Мицкоски.
Ахмети комуницира со партиите со евроатлантска определба и со стратешките партнери
Новото парламентарно мнозинство, додаде тој, подразбира заеднички блок составен од Коалицијата за „Oбнова на Македонија“ која ја предводи ВМРО-ДПМНЕ, коалицијата Алијанса на Албанците и Алтернатива, политичката партија Левица и Движењето Беса.
„Ова е коалиција против криминалот и корупцијата на власта, против изневерените надежи, блок за напредок и нова иднина. Очекувам во периодот којшто следи ова мнозинство да биде зголемено“, рече Мицкоски.
Тачи: Следната влада ќе биде на чело со Заев
Најави дека во понеделник ја чекаат оставката од премиерот Зоран Заев да стигне во Собранието, а ако тоа не се случело ќе почнеле процедура за гласање недоверба на владата.
Инаку Заев најави оставка од премиерската и партиската функција по неделните локални избори на кои победи ВМРО-ДПМНЕ. Оставката се уште не е стигната во Собранието бидејќи како што велат од СДСМ се уште се прават консултации за тоа кој ќе биде иден мандатар од мнозинството кое до вчера тврдеа дека е стабилно.