Военкомат Татарстанда кабат повестка җибәрә башлауның сәбәбен аңлатты
Бөгелмә ирләргә военкоматы «намус кушканча» килергә чакырган.
Бөгелмә военкоматы предприятие җитәкчеләренә хезмәткәрләрне җыеп китерүне йөкләгән. Военкомат моны «мәгълүматлардагы төгәлсезлекләрне бетерү» белән аңлаткан, дип хәбәр итә РБК.
«Безнең базада беркайчан да ИНН, СНИЛС юк иде, хәзер шулар кирәк. Шуның өчен генә чакырабыз», – дигән хәрби комиссариат.
Бу яңа мобилизациягә әзерлекме дип сорагач, военкомат вәкиле: «Мин моны әйтмим, моны сезгә беркем дә әйтмәячәк», дигән. Килмәүчеләргә нинди санкция дип сорагач, бернинди җәза да булмаячагын, «намус кушканча» килергә кирәклеген әйткән.
Республика военкоматында массакүләм повестка җибәрү юклыгын әйткәннәр. Матбугат чаралары кайбер төбәкләрдә, әйтик, Чувашия, Башкортстанда хәрби хезмәттә булганнарга повесткалар килүен әйтә.Татарстан военкоматы, повестка булган очракта, моны бары тик мәгълүматларны төгәлләштерү максатыннан гына эшләнелгәнен әйткән.