Новости за 04.10.2019

Бер делла кеман чохь, Несарахь кхеле вуьгуш веддарг, Гуьмсехь кIомал юхку зуда лаьцна

Инди маьршаяккхаран боламан хьалханчан Ганди МахIатман чим чохь болу урна лачкъийна цу мехкан юккъерчу штатерчу мемориалан чуьра. Цу чохь долчу политикан сурташна тIе яздина "ямартхо" аьлла. Иза хилла Гандин 150 кхаьчначу дийнахь ГIадужу-беттан 2-хь, хаам  бо The Wire зорбан гIирсо, яздо Маршо Радион Оьрсийн сервисо.   Ганди вийра 1948-чу шарахь Дечкен-баттахь. Цуьнан дакъа дагийра, ткъа чим, индуистийн ламасташца догIуш доццушехь, маситта декъе бийкъира. Царах цхьа дакъа дара латтош Мадхья-Прадеш штатерчу мемориалехь. Читать дальше...

Цхьана стагана чов йина ТаIзарш кхочушдон федералан сервисан ГIалгIайчуьрчу урхаллан белхахоша вовшашна герзаш деттарехь, хаам бо "Интерфаксо".   Еарин сарахь, ГIадужу-беттан 3-хь, Яндаре эвлан гергахь хилла иза. Гайх герз кхетта цхьа белхахо дIакхачийна Несарарчу клиникан дарбанан цIийне. Оцу инцидентехь дакъалаьцнарш лецна бу. Хилларг толлуш ду.

ГIалгIайчоьнан оьрсийн мукъамин-драмин театро ши спектакл гойтур ю Соьлж-ГIалахь. Цунах лаьцна шен Instagram-хь хаам бина цу театран исбаьхьаллин куьйгалхочо Базоркина Зарас.   Цо дийцарехь, Нохчийчуьрчу хьажархошна гойтур ю ши спектакл. Цу шиннах цхьаъ – "Из тьмы веков" (БIешерийн кIоргера) - хир ю Нурадиловн цIарахчу тетарехь, ткъа важа – "Две стрелы" (СекхаIодан ши чIу) - хир ю Лермонтовн театрехь.   Базоркинас дийцарехь, ГIалгIайчуьрчу театро Нохчийчохь спектаклш гайтар дакъа ду Оьрсийчохь дIахьочу театрийн марафонан. Читать дальше...

Соьлж-ГIалахь кечлуш бу оьрсийн паччахьан инарлан Чермоев Орцин цIе тиллина эвла схьаелла. Хьалхо Нохчийчоьнан куьйгалхочо Кадыров Рамзана тIедиллинера меттигерчу Iедалшна 35-чу а, 56-чу а гIалин дакъошна реконструкци яр. Кхаа баттахь цигахь ехкина берийн ловзу меттигаш, дехкина некъаш, тесна газан а, хин а биргIанаш, тодина маьждиг а, 35 цIа а, 23 пхеа петарх лаьтта коттеджаш а, 42 нехан долара хIусам а. Керла хIусамаш лур йолуш ю 200 гергга доьзална. Керлачу эвлахь кхуллуш ю социалан инфраструктура... Читать дальше...

Зуламан тобан юкъахь ГIалгIайчуьрчу бахархошкара, коьртачу декъана зударшкара, кхерамаш тийсарца ахчанаш дахарна лаьцна Несаран кIоштара Альтемиров Iийса ведда шена гIароле хIиттийначу полисхойх. Цунах лаьцна хаам бо "Интерфаксо", шен хьасташна тIе а тевжаш. ГIалгIайчоьнан чоьхьарчу гIуллакхийн министраллан векало бинчу хаамца, Несарарчу кхеле вуьгуш Альтемиров къайлаваьлла кIайн бос болчу Ford Focus машена а хиина. Веддачуьнан цIахь таллам бича карийна и машен.   38 шо долу Альтемиров лаьцнера... Читать дальше...

Гуьмсан гIалин кхело колонехь даккха 4 шо хан тоьхна меттигерчу яхархочунна Ю. Заретина, бакъ а йоцуш наркотикаш йохкарна. Цунах лаьцна хаам бо Нохчийчуьрчу прокуратуро.   "Суьдехь дов луьстуш гучудаьлла, оцу зудчо кIомал йоьхкина хилар оперативан-талламан мероприятехь дакъалоцучу стагана", - аьлла ду прокуратурин пресс-релизехь.

Москохара Соьлж-ГIала догIучу кеман охьахаа дезна Волгоградерчу аэропортехь, цу тIехь 2 бутт кхаьчна бер далар бахьана долуш. Зорбанан гIирсаша яздарехь, 2 бутт болу йоI сихонца дIакхачиййна хилла дарбанан цIийне, амма реанимацин мероприятеш йина лоьраш гIорасиз хилла иза кIелхьаръяккха.   Болчу хаамца, дуьненчу еза цамгарца даьллачух тера ду и бер. И бахьана долуш делла хила мега иза кемантIехь