Ницкъахоша лачкъийна волу Нохчийчуьра ЛГБТК-жимстаг Кубанерчу колоне кхачийна
Нохчийчуьра ницкъахоша лачкъийна хиллачу Исаев ИсмаьIилан набахте юха а хийцина – Краснодаран махкан №11 йолчу колоне схьавалийна иза. Шен тоьхна ялх шо доккхур ду цо кхузахь. Исаевн адвокаташа бахарехь, цунна тIаьхьбовлар цуьнан сексуалан хьежамашца а, гендеран шатайпаналлица а доьзна ду – трансгендеран дехьавалар дан гIерташ хиллера иза гармоналан терапийх пайда а оьцуш.
Ахтарский-эвла Исаев дIавигарх лаьцна Кавказ.Реалиига дийцира "СК SOS" кризисан тобанехь. Хьалхо Исаев Краснодаран СИЗО-1 чохь вара – дехьа ваккхаран транзитан меттиг ю иза.
Исаевн ваша Магамадов Салахь Владимиран №2 йолчу "Владимирский централ" набахтехь вуьссуш ву. Кхелан сацамца а догIуш, цигахь шо даккха деза цо. ТIаккха луьрачу рожан колоне хьажор ву иза.
Мангал-беттан 7-хь хиира, Исаев а, Магамадов а, шаьш 513 де даьккхина йолчу Соьлжа-ГIаларчу СИЗО-1 чуьра дIавигина хилар, цигахь уьш 2021-чу шеран чиллан-беттан 9-хь дуьйна бара.
Нохчийчуьрчу ТIехьа-Мартанан кхело бехкевеш сацамбира 20 шо долчу Магамадовн а, 18 шо долчу Исаевн а хьокъехь Чиллан-беттан 22-чохь. Нохчийчуьрчу Лакхарчу кхело апелляцин кхелехь листира иза Стигалкъекъа-беттан 11-чохь, амма хийцам боцуш битира. ТIемалошна гIо дина аьлла, бехкаш дехкира цу шинна. Магамадовна бархI шо тоьхна, Исаевна – ялх шо.
Магамадов а, Исаев а къар ца ло, шаьшиъ цхьана а хIуманна бехке вац бохуш. Адвокаташа тергалдо бехке хиларх тоьшалла дина цахилар а, кхел йоьдучу заманчохь низамаш дуккхаза дохийна хилар а, царна хета, вежаршна тIаьхьабовлар церан сексуалан ориентацица а, гендеран идентификаллица а доьзна хилар (цу шиннах цхьаъ гей ву, важа кхечу гендере дехьавала дагахь хиллера), иштта Нохчийчуьрчу Iедална оппозицехь йолу телеграм-канал лелор.
2021-чу шеран чиллан-баттахь Магамадов а, Исаев а лачкъийра Нижний Новгородерчу кризисан хIусамера, и шиъ Нохчийчу дIавигира. 2021-чу шеран Марсхьокху-баттахь цара дIахьедира, шайна йетта, бехкаш тIелаца бохуш. Царна тIехь къизаллаш лелорах бехктакхаман гIуллакх доло реза ца хилира Нохчийчуьра Талламан комитетан урхалла.