Басаевн тобанца хилла ву аьлла диъ шо хан тоьхна Дагестанера вахархочунна
Дагестанан вахархочунна Шамбилов Ренатана диъ шой, ворхI буттий хан кхайкхийна колонихь йаккха 1999-чу шарахь Оьрсийчоьнан эскархошна тIелатарна. Оцу кепара сацам бовзийтина Хасав-Юртан кIоштан кхело.
Талламан версица, тIеман буьйранчаша Басаев Шемала а, Хаттаба а герзашца вовшахтоьхначу тобанашлахь хилла ву Шамбилов, цо дакъалаьцна Дагестанера Ботлихан кIоштахь оьрсийн салтишна тIелеташ. Бакъоларйаран органийн белхахочун дахарна кIело йарна кхело бехк тIехь битина цунна, хаамбо "Интерфакс-Юг" агенталло Ставрополан кIоштахула йолчу ФСБ-н сервисан пресс-гIуллакххошна тIетевжина. Зорбане билгалдаьккхина, 1999-чу шарахь Шамбилов 18 шо кхачанза хиларна "таIзар кIеда дитина" аьлла.
Басаев Шемалан а, Хаттабан а гIаттамхой Дагестане чубахара Нохчийчоьнан дозана тIера, цигахь тIемаш бира цара 1999-чу шеран марсхьокху-беттан юьххьера гIадужу-беттан 15-чу дийне кхаччалц цкъа хьалха Ботлихан, тIаьхьо Новолакскан кIошташкахь. Официалан хаамашца, цигахь вийна 280, лазийна 800 сов Оьрсийчоьнан эскархой, полисхой, иштта могIарера нах а. И хиламаш цхьахдолчу коьртачу бахьанех хилира Нохчийчохь ШолгIа тIом боло, цуьнан гурашкахь Оьрсийчоьнан эскарш Нохчийчу далийра 1999-чу шеран гIадужу-беттан 30-чохь.
ГIадужу-баттахь Ставрополан кIоштан Нефтекумскехь а, Томскехь а ши стаг лецира, Басаевн а, Хаттабан а тобанашца хилла ву аьлла. Къайлахчу сервисаша йовзийтина цу шинна цIераш: Бегельдиев Т.Х,, Елманбетов А.С.
Кхин а шиъ Басаевн а, Хаттабан а тобанера ву аьлла, стохка гIуран-баттахь лецира. Ставрополан кIоштара ши вахархо вара и шиъ – Бакиев Каирбек а, Канмурзаев Ильхан а.
Бехктакхаман жоьпалла тIедожадо иштта, 1990-2000-чу шерашкахь федералан эскаршна дуьхьал тIом бина хилла, амма амнисти еллачарна а. Кавказ.Реалиино ма-дарра яздира иштачу цхьана гIуллакхах лаьцна – ИдаловгIеран вежаршна дуьхьал даьккхинчу бехкзуламан гIуллакхах.
Адвокаташа а, бакъоларъярхоша а дечу тоьшаллашца, тIемалой хиларна бехкебеш жоьпе ийзиначу наха дукха хьолехь кхелашкахь хаам бо, шайга ницкъаша дареш дайтина, олий.