“ვერ ვიფიქრებდი, თუ 30 წელს მივაღწევდი”, – ჯეინ ფონდა საიდუმლო დაავადების შესახებ
ჯეინ ფონდა ამბობს, რომ ვერ იფიქრებდა, თუ 30 წლამდე იცოცხლებდა. ეს მაშინ ხდებოდა, როცა პარალელურად კვებით აშლილობას ებრძოდა, რაც მისი ცხოვრების “საიდუმლო” ნაწილად იქცა.
“ჩემს 20-იან წლებში ფილმებში თამაში დავიწყე. ბულემია ძალიან მძიმედ მტანჯავდა. ეს ჩემს ჩრდილად და საიდუმლოდ იქცა. მე უბედური ვიყავი. არ მეგონა, თუ 30 წლამდე ვიცოცხლებდი. გარეთ არ გავდიოდი. არ მივდიოდი პაემნებსა და შეხვედრებზე, რადგან თავს ცუდად ვგრძნობდი და კვებით აშლილობას ვებრძოდი. ასევე იმ ფილმებში თამაში მიწევდა, რომლებიც დიდად არ მომწონდა”.
“ბარბარელას” ვარსკვლავი გულღიად საუბრობს თავის გამოცდილებაზე და ასევე იხსენებს, რომ თავდაპირველად ეს დაავადება არც ისე რთული ჩანდა, თუმცა თანდათან მისი ცხოვრება დააზიანა.
“ეს შენს გარეგნობას ზიანს აყენებს. მუდამ დაღლილი ხარ. ურთიერთობები წარმოუდგენლად რთულდება. არავინ იცის სინამდვილეში რას აკეთებ. შენი დღე მთლიანად საკვების გარშემო ტრიალებს, რაც თავს მარტოსულად გაგრძნობინებს. და შემდეგ შენ უბრალოდ დამოკიდებული ხდები”, – აღნიშნავს მსახიობი.
ჯეინი ამ დაავადებას წლების განმავლობაში ებრძოდა. ამბობს, რომ ეს მის 40-იან წლებშიც გაგრძელდა, თუმცა შემდეგ აღმოაჩინა მისგან თავის დაღწევის გზები და თანდათანობით გათავისუფლდა.
“მერე ეს უფრო მარტივი გახდა. არ ვიცოდი, თუ არსებობდა ჯგუფები, რომელთან ერთადაც შეგეძლო ამ პროცესებთან ბრძოლა. ამაზე არავინ საუბრობდა. თავიდან ძალიან მიჭირდა, მაგრამ შემდეგ უბრალოდ შევწყვიტე ამის კეთება”.
წყარო/ფოტო: Pop Culture