რამზან კადიროვის თქმით, თავდასხმა მოხდა სპეცდანიშნულების ქვედანაყოფ „ახმატის“ მეთაურ აპტი ალაუდინოვზე
კადიროვის თქმით, 8 თებერვალს ალაუდინოვმა თავისი თანაშემწეების გზით მიიღო წერილი, რომელიც „მომწამვლელი ნივთიერებით“ იყო გაჟღენთილი. კონკრეტულად რა ნივთიერებით, ცნობილი არ არის, მიმდინარეობს ანალიზი. სპეცრაზმის მეთაური და მისი ორი ადიუტანტი პირველადი სამედიცინო დახმარების მიღების შემდეგ მოსკოვის საავადმყოფოში მოათავსეს. რამზან კადიროვის თანახმად, მათ სიცოცხლეს საფრთხე არ ემუქრება. თუ რა სახის მოწამვლაზეა ლაპარაკი, არ არის ცნობილი.
კადიროვმა განაცხადა, რომ დაიწყო ალაუდინოვზე თავდასხმის გამოძიება და „უკვე არის პირველი შედეგები“. თავად ალაუდინოვს მომხდარზე კომენტარი არ გაუკეთებია. სად მოხდა თავდასხმა, კადიროვი არ ახსენებს. მაგრამ ცნობილია, რომ თებერვლის დასაწყისში ალაუდინოვი უკრაინაში მიმდინარე ომში იმყოფებოდა.
ჯერჯერობით შეუძლებელია დამოუკიდებელი წყაროებით იმის შემოწმება, მართლაც მოხდა თუ არა ალაუდინოვზე თავდასხმა და მოათავსეს თუ არა ის საავადმყოფოში.
ჩეჩნეთში რამზან კადიროვის რეჟიმის კრიტიკოსებმა ადრე განუცხადეს რადიო თავისუფლებას, რომ აპტი ალაუდინოვი უკრაინაში საომრად გაემგზავრა „ცოდვების გამოსასყიდად“. 2019 წელს მას ბრალს სდებდნენ რამზან კადიროვის წინააღმდეგ შეთქმულებაში. ალაუდინოვმა უარყო ყველა ბრალდება. 2014 წელს ალაუდინოვი აშშ-ის სანქციების სიაში შეიყვანეს, ოდნავ მოგვიანებით მას უარი ეთქვა ლატვიაში შესვლაზე. 2020 წელს ალაუდინოვი დიდი ბრიტანეთის სანქციების სიაში მოხვდა.