მარგარიტა სიმონიანი მოუწოდებს რუსეთის მოქალაქეებს, რომ სამშობლოსთვის თავი გაწირონ
ტელეკომპანია Russia Today-ის მთავარმა რედაქტორმა მარგარიტა სიმონიანმა მოუწოდა რუსეთის მოქალაქეებს, რომ მართალი საქმისთვის თავი გაწირონ. მისი თქმით, ეს უკეთესია, ვიდრე სიბერეში რაღაც მძიმე დაავადებისგან გარდაცვალება. ამის შესახებ ინფორმაციას 9tv.co.il ავრცელებს.
„განსხვავება 10-20 ან თუნდაც 30 წელიწადში არაფერია. სამყაროს მასშტაბებით კი ის ძალზე მცირეა. მადლობა ღმერთს, მე 3 შვილი მყავს, ბევრ რამეს მივაღწიე ცხოვრებაში, თუ ღმერთი მომცემს საშუალებას, კიდევ ვიბრძოლებ, დავიცავ ჩემს ქვეყანას, ამისთვის მადლობელი ვიქნები“, – განაცხადა სიმონიანმა.
მანამდე რუსეთის მოქალაქეებს მოუწოდა დაიღუპონ გმირულად უკრაინის ფრონტზე ცნობილმა პროპაგანდისტმა ვლადიმერ სოლოვიოვმა.
„სიცოცხლე ნამეტანი გადაფასებულია. რატომ უნდა გვეშინოდეს იმის, რაც გარდაუვალია. თან ჩვენ ხომ სამოთხეში მოვხვდებით. სიკვდილი არის ერთი, მიწიერი გზის დასასრული და მეორე გზის დასაწყისი. ამან შენს მიერ მიღებულ გადაწყვეტილებებზე არ უნდა იმოქმედოს“, – განაცხადა სოლოვიოვმა.
ასევე, რუსებს წავიდნენ და დაიღუპონ უკრაინაში, მოუწოდა მღვდელმსახურმა ანდრეი ტკაჩოვმა.
„ადამიანები ხშირად კვდებიან როგორც ღორები, იხრჩობიან ნარწყევით – როდესაც ბევრს სვამენ. არ სჯობია იარაღით ხელში სამშობლოსთვის დაიღუპო როგორც გმირი, როგორც კაცი. სიკვდილის წინ უნდა ილოცოთ და თქვენი სული მაშინვე სამოთხეში მოხვდება“, – განაცხადა ტკაჩოვმა.