„ხალხის ძალა" გეგმავს ალტერნატიული კანონპროექტის ინიცირებას
„ხალხის ძალამ“ მივიღეთ გადაწყვეტილება, ინიცირება გავუკეთოთ, ახალ ალტერნატიულ კანონპროექტს „უცხოური აგენტის რეგისტრაციის აქტის შესახებ“. ეს არის სუფთა ამერიკული ანალოგი და ამიტომ ჩვენ გავაკეთებთ პირდაპირ თარგმანს და დავაინიცირებთ კანონპროექტს. ამისთვის დაგვჭირდება ერთი-ორი დღე.
თავიდან, როდესაც მივიღეთ გადაწყვეტილება „ხალხის ძალის“ დეპუტაციამ, რომ ამ შინაარსის კანონი წარგვედგინა, ჩვენ ის გავაცანით უმრავლესობის ლიდერს [ირაკლი კობახიძეს] და ამ შეხვედრას ესწრებოდა ფრაქცია „ქართული ოცნების“ თავმჯდომარეც [მამუკა მდინარაძე].
ჩვენ გვქონდა თავიდანვე შეთავაზება, რომ წარგვედგინა პარლამენტისთვის პირდაპირი ანალოგი ამერიკული ვარიანტისა, მაგრამ მათ მიერ იყო წინადადება, რომ უფრო ლიბერალური კანონი განგვეხილა და არა პირდაპირ ამერიკული კანონპროექტი წარგვედგინა განსახილველად.
ჩვენ მივიღეთ მათი შემოთავაზება და ავიღეთ უფრო ლიბერალური, რომელიც ეფუძნებოდა ამერიკულ კანონმდებლობას", - განაცხადა ხუნდაძემ.
„ხალხის ძალის" წევრი ალტერნატიული კანონპროექტის ინიცირების მიზეზად „აქტიურ სპეკულაციებს" ასახელებს.
„ჯერ საკომიტეტო მოსმენები არ დაწყებულა, მაგრამ დაიწყო აქტიური სპეკულაციები ამის გარშემო, რომ თითქოს ის არის რუსული კანონის ანალოგი. არავითარი საერთო მასთან არ აქვს", - თქვა ხუნდაძემ.
დეპუტატის თქმით, პარლამენტის წევრებს ორი კანონპროექტიდან არჩევანის გაკეთების საშუალება ექნებათ.
აშშ-ში ამ ტიპის კანონი (FARA) პირველად 1938 წელს მიიღეს, მეორე მსოფლიო ომის წინა პერიოდში, ნაცისტური პროპაგანდისთვის ხელის შესაშლელად. მოგვიანებით კანონმა სახეცვლილება განიცადა, მისი მოქმედების არეალი დავიწროვდა და ახლა ის ძირითადად უცხოურ ლობისტურ ორგანიზაციებს და ლობისტებს შეეხება.
საქართველოში შემუშავებული კანონი არ არის აშშ-ში მოქმედი კანონის მსგავსი, ის ჰგავს რუსულ კანონს, თქვა 20 თებერვალს საქართველოში ვიზიტით მყოფმა ამერიკელმა სენატორმა ჯინ შაჰინმა „ხალხის ხალის" პირველი კანონპროექტის შესახებ.
„ეს კანონი არის მაგალითი, რატომაც ვსაუბრობთ საქართველოს დემოკრატიის უკუსვლაზე“, - განაცხადა შაჰინმა სენატორ დიკ დურბინთან ერთობლივ პრესკონფერენციაზე.
საქართველოში მოქმედმა არასამთავრობო ორგანიზაციები და მედიასაშუალებები მიიჩნევენ, რომ კანონპროექტი ("უცხოური გავლენის გამჭვირვალობის შესახებ"), რომელიც საპარლამენტო უმრავლესობის ნაწილმა - "ხალხის ძალამ" მოამზადა, ქვეყნის მოქალაქეების წინააღმდეგაა მიმართული. 300-მდე არასამთავრობო და მედიაორგანიზაცია მიიჩნევს, რომ ეს კანონი მიზნად ისახავს დაუცველი დარჩეს მოწყვლადი ჯგუფები.