ანა აბაშიძემ კანდიდატურა მოხსნა იუსტიციის უმაღლესი საბჭოს არამოსამართლე წევრთა კონკურსიდან
ინფორმაციას კონკურსის დატოვების შესახებ თავად ანა აბაშიძე ავრცელებს ფეისბუკის პირად გვერდზე და აქვეყნებს წერილს, რომელიც მან პარლამენტის თავმჯდომარეს, შალვა პაპუაშვილს გაუგზავნა.
"როგორც ცნობილია, მმართველმა გუნდმა, საქართველოს პარლამენტში, საჯაროდ მხარი დაუჭირა რუსულ კანონპროექტს - საქართველოში სამოქალაქო თავისუფლების შეზღუდვის შესახებ. მმართველმა გუნდმა სამოქალაქო სექტორის მრავალათასიან წარმომადგენლებს, მათ შორის ორგანიზაციას, რომელსაც მე წარმოვადგენ, უცხო ქვეყნის გავლენის აგენტი უწოდა, ისე, როგორც ამას ჩვენი ქვეყნის მტერი, აგრესორი, რუსეთის ფედერაციის პრეზიდენტი, ვლადიმირ პუტინი უწოდებს თავის მოქალაქეებს.
მინდა გითხრათ, რომ სამოქალაქო საზოგადოების დევნის რუსული პოლიტიკის გადმოტანით საქართველოში, თქვენ აზიანებთ ქართველი ხალხის მრავალწლიანი თავდადებით მოპოვებულ დემოკრატიას, რისკის ქვეშ აყენებთ ჩვენი ქვეყნის დემოკრატიული განვითარების პერსპექტივას, უსამართლო პოლიტიკით პასუხობთ ქვეყანაში სამოქალაქო მოძრაობებს, შედეგად კი გაუსაძლის მდგომარეობაში აყენებთ ყველაზე დაუცველ მოქალაქეებს და ამას სახელმწიფოს მხრიდან დაჩაგრული და სხვაგვარად დაუცველი ადამაინების დახმარების მიზნით მომუშავე, კეთილსინდისიერი და პროფესიონალი ადამიანების ღირსების შელახვის გზით აკეთებთ" - წერს ანა აბაშიძე პარლამენტის თავმჯდომარეს დღეს, 24 თებერვალს გაგზავნილ წერილში.
"პარტნიორობა ადამიანის უფლებებისთვის", რომელსაც ანა აბაშიძე წარმოადგენს და რომელმაც წარადგინა ის უმაღლესი საბჭოს წევრების შესარჩევ კონკურსში, ძირითადად შშმ პირების, ქალებისა და ბავშვების უფლებების დაცვის მიმართულებით მუშაობს. ანა აბაშიძე ამ ორგანიზაციაში 2013 წლიდან მუშაობს.
"ვიცი რომ დიდად არ იდარდებენ, შეიძლება გავახარე კიდეც, მაგრამ მე იმას გავაკეთებ რაც სწორად მიმაჩნია. ღირსებას არავის შევალახინებ!" - ასე ხსნის აბაშიძე თავის გადაწყვეტილებას კონკურსიდან კანდიდატურის მოხსნის შესახებ.
კანონპროექტი "უცხოური გავლენის გამჭვირვალობის შესახებ" საქართველოს პარლამენტში ოფიციალურად 20 თებერვალს დაარეგისტრა ქართული ოცნებიდან "სიმართლის სათქმელად" გამოყოფილი დეპუტატების პოლიტიკურმა მოძრაობა "ხალხის ძალამ."
მმართველმა პარტია "ქართულმა ოცნებამ" "უცხოური გავლენის გამჭვირვალობის შესახებ" კანონპროექტის დარეგისტრირებიდან მალევე განაცხადა, რომ მხარს დაუჭერენ "ხალხის ძალის" ინიციატივას.
კანონპროექტის მიხედვით, ყველა, ვინც "უცხოური გავლენის აგენტად" მოიაზრება, ვალდებულია დარეგისტრირდეს საჯარო რეესტრში, ამავე სახელწოდების ბაზაში.
დოკუმენტის მიხედვით, "უცხოური გავლენის აგენტებად" მოიაზრებიან:
ყველა არასამეწარმეო(არაკომერციული) იურიდიული პირი, მათ შორის ყველა არასამთავრობო ორგანიზაცია, რომლის წლიური შემოსავლის 20 პროცენტზე მეტი "უცხოური ძალაა". თუმცა, არა - სახელმწიფო ორგანიზაციები ან საქართველოს კანონმდებლობით დაფუძნებული სპორტული ფედერაციები;
ტელევიზიები, რომელთა შემოსავლის 20 პროცენტზე მეტი "უცხოური ძალაა"(არ იგულისხმება რეკლამა);
მასობრივი ინფორმაციის საშუალებები, მათ შორის გაზეთები და ონლაინ მედიასაშუალებები, რომელთა შემოსავლის 20 პროცენტზე მეტი "უცხოური ძალაა"(არ იგულისხმება რეკლამა).