NDI: მთავრობის საქმიანობის დადებითი შეფასება ათი პროცენტითაა გაზრდილი

აშშ-ის "ეროვნულ დემოკრატიული ინსტიტუტის" (NDI) ბოლო კვლევის მიხედვით, საქართველოში მთავრობის საქმიანობას გამოკითხულთა 54% დადებითად აფასებს, 38% კი - უარყოფითად. მიმდინარე წლის მარტში ეს მაჩვენებელი შესაბამისად 43 - 43% იყო. საზოგადოებრივი აზრის კვლევა 2023 წლის 12 ოქტომბრიდან 4 ნოემბრამდე პერიოდში ჩატარდა.

ჯამში გამოკითხულთა უმრავლესობის მიერ პრემიერის საქმიანობა მიჩნეულია საშუალოდ ან კარგად, 29%-ისთვის - კარგად, 37%-ისთვის - საშუალოდ. ხოლო 26% პრემიერის საქმიანობას უარყოფითად აფასებს.

პრეზიდენტის საქმიანობა მოსწონს 16%-ს , 41% საშუალოდ აფასებს, 30 % კი - ცუდად.

პარლამენტის საქმიანობას დადებითად აფასებს 13%, საშუალოდ - 44%, 34%-ს კი არ მოსწონს.

უმრავლესობის, 53%-ის აზრით, პარლამენტი არ ითვალისწინებს მათნაირი ადამიანების შეხედულებებს.

საზოგადოებრივი აზრის კვლევა NDI-ის დაკვეთით 2023 წლის ოქტომბერ-ნოემბერში პირისპირ გამოკითხვის გზით ჩაატარა "CRRC საქართველომ". კვლევა დაფინანსებულია დიდი ბრიტანეთისა და ჩრდილოეთ ირლანდიის გაერთიანებული სამეფოს მთავრობის საგარეო, თანამეგობრობისა და განვითარების ოფისის კარგი მმართველობის ფონდის მიერ.

საველე სამუშაოების პერიოდი: 12 ოქტომბერი - 4 ნოემბერი, 2023 წელი;

2,068 დასრულებული ინტერვიუ (28% გამოპასუხება);

საშუალო ცდომილების ზღვარი +/- 2,2%.

შენიშვნა: ცდომილების ზღვარი იცვლება სხვადასხვა პასუხის მიხედვით.

შერჩევა

წარმომადგენლობითი შერჩევა ქვეყნის მასშტაბით (ოკუპირებული ტერიტორიების გარდა). ამასთან, დამატებით წარმომადგენლობითი შერჩევა თბილისში, დიდ ურბანულ დასახლებებში, პატარა ურბანულ დასახლებებში, სოფლის ტიპის დასახლებებში, ეროვნული უმცირესობებით მჭიდროდ დასახლებულ რეგიონებში;

დიდი ზომის ურბანული დასახლებების სტრატა მოიცავს იმ ქალაქებს, რომელთა მოსახლეობა არის 40 ათასი და მეტი. ესენია ბათუმი, ზუგდიდი, რუსთავი, ფოთი, გორი და ქუთაისი;

მცირე ზომის ურბანული დასახლებების სტრატა მოიცავს ყველა დანარჩენ ქალაქსა და დაბას, რომელთაც აქვთ ურბანული სტატუსი;

ეთნიკური უმცირესობების სტრატა მოიცავს იმ დასახლებებს, სადაც ეთნიკური უმცირესობების (ძირითადად სომხური და აზერბაიჯანული) ხვედრითი წილი 40 პროცენტზე მეტია. ეს დასახლებები მდებარეობს ქვემო ქართლში, სამცხე- ჯავახეთსა და კახეთში.

მეთოდოლოგია

NDI და CRRC კვლევაში იყენებენ სტრატიფიცირებული და კლასტერული შერჩევის მეთოდს:

სტრატიფიცირება – მოსახლეობის დაყოფა შედარებით ჰომოგენურ ჯგუფებად;

კლასტერინგი – თითოეული ჯგუფიდან (სტრატა) პატარა გეოგრაფიული არეალების შემთხვევითი შერჩევა;

შინამეურნეობის შერჩევა მოხდა შემთხვევითი შერჩევის პრინციპით;

რესპონდენტების შერჩევა მოხდა კიშის ცხრილის გამოყენებით;

არ ხდება შემთხვევით შერჩეული შინამეურნეობის ან პიროვნების ჩანაცვლება;

ყველა ინტერვიუ ჩატარდა პირისპირ ინტერვიუს მეთოდით, 18+ ასაკის მოსახლეობასთან, სამიდან რომელიმე ენაზე: ქართული, სომხური და აზერბაიჯანული.